Kanz al-Ummal: Hadith 12719

12719 مجزاۃ بن زاھر اپنے والد سے، وہ ناجیۃ بن جندب (رض) سے روایت کرتے ہیں کہ میں نبی اکرم (صلی اللہ علیہ وآلہ وسلم) کی خدمت میں حاضر ہوا جب کہ آپ (صلی اللہ علیہ وآلہ وسلم) کو ہدی (مکہ میں) لانے سے روک دیا گیا تھا۔ میں نے عرض کیا : یارسول اللہ ! میرے ساتھ ہدی بھیج دیجئے میں اس کو حرم میں لے جاکر نحر (قربان) کردوں گا۔ حضور اکرم (صلی اللہ علیہ وآلہ وسلم) نے ارشاد فرمایا : تو اس کو کیسے لے جائے گا ؟ انھوں نے عرض کیا : میں ایسی وادیوں سے اس کو لے کر جاؤں گا جہاں سے وہ لوگ (مشرکین) اس پر قادر نہ ہوسکیں گے۔ چنانچہ میں اس کو لے کر چلا گیا اور لے جاکر حرم میں نحر (قربان کردیا) ۔ ابونعیم