Kanz al-Ummal: Hadith 13738

13738 عبداللہ بن عامر بن ربیعہ سے مروی ہے کہ حضرت عمر بن خطاب (رض) نے قدامہ بن مظعون کو بحرین کا گورنر بنادیا۔ قدامہ اپنے منصب پر نکلے۔ وہاں ان کے متعلق کسی طرح کی برائی اور بدکاری کی شکایت نہیں آئی سوائے اس کے کہ وہ نماز میں حاضر نہ ہو پاتے تھے۔ وہاں کے قبیلے عبدالقیس کے سردار جارود حضرت عمر بن خطاب (رض) کے پاس حاضر خدمت ہوئے اور عرض کیا یا امیر المومنین ! قدامہ نے شراب نوشی کی ہے اور مجھ پر لازم ہے کہ اگر میں حدود اللہ میں سے کسی حد کو دیکھوں تو اس کا قضیہ آپ کو ضرور پہنچاؤں۔ حضرت عمر (رض) نے پوچھا : جو تم کہہ رہے اس کی گواہی کون دے گا ؟ جارود نے حضرت ابوہریرہ (رض) کا نام لیا کہ وہ بھی اس بات کی شہادت دیں گے۔ چنانچہ حضرت عمر (رض) نے قدامہ کو مراسلہ بھیجا کہ وہ میرے پاس آئیں۔ چنانچہ وہ حاضر ہوگئے۔ جارود حضرت عمر (رض) سے (بار بار) کہتے : اس پر کتاب اللہ کو نافذ کریں (حد شراب جاری کریں) حضرت عمر (رض) نے جارود سے پوچھا : تم اس پر شہادت دینے کے لیے آئے ہو یا اس کے دشمن کا کردار ادا کررہے ہو ؟ جارود بولے میں تو فقط شاہد ہوں۔ حضرت عمر (رض) نے فرمایا : تب تم نے اپنی شہادت ادا کردی (اب خاموش رہو) چنانچہ جارود تب تو خاموش ہوگئے۔ لیکن اگلے روز پھر مصر ہوئے کہ اس پر حد جاری کریں۔ تب حضرت عمر (رض) نے فرمایا : بس میں تم کو ان کا دشمن قرار دیتا ہوں، اب صرف ایک گواہ (ابوہریرہ (رض)) بچ گیا ہے (جس کی بناء پر حد جاری نہیں کی جاسکتی) اب یا تو تم اپنی زبان کو لگام دو ورنہ میں تمہارا برا حشر کروں گا۔ جارود بولے : اللہ کی قسم ! یہ حق بات نہیں ہے کہ آپ کا چچا زاد (قدامہ) تو شراب پئے اور آپ الٹا مجھے براگردانیں (آخر حضرت عمر (رض)) نے جاود کو چھوڑ دیا۔
ابن سعد، ابن وھب