Kanz al-Ummal: Hadith 13857

13857 عبداللہ الدیلمی اپنے الد فیروز (الدیلمی) سے روایت کرتے ہیں۔ فیروز فرماتے ہیں میں رسول اللہ (صلی اللہ علیہ وآلہ وسلم) کی خدمت میں حاضر ہوا اور عرض کیا : یارسول اللہ ! ہمارے انگوروں کے باغ ہیں۔ حالانکہ شراب کی حرمت نازل ہوچکی ہے (ورنہ ہم ان کی شراب بنالیتے) اب ہم ان انگوروں کا کیا کریں یارسول اللہ ! آپ (صلی اللہ علیہ وآلہ وسلم) نے ارشاد فرمایا : تم ان کی کشمش بنالو۔ پوچھا : یارسول اللہ ! پھر کشمش کا ہم کیا کریں گے ؟ آپ (صلی اللہ علیہ وآلہ وسلم) نے فرمایا : تم ان کو صبح کے وقت پانی میں ڈالو پھر شام کو پی لو۔ اور شام کے وقت پانی میں ڈالو پھر صبح کو پی لو۔ میں نے عرض کیا یارسول اللہ ! ہم اس کو کچھ دیر اور نہ چھوڑ دیں تاکہ وہ مزید گاڑھا ہوجائے۔ آپ (صلی اللہ علیہ وآلہ وسلم) نے فرمایا : پھر تم اس کو (مٹی کے برتن) گھڑے (وغیرہ) میں نہ بناؤ بلکہ مشکیزے میں بناؤ۔ پھر اگر اس کو (نکالنے اور) عرق کھینچنے میں دیر بھی ہوجائے گی تو وہ (شراب بننے سے پہلے) سرکہ بن جائے گا۔ پھر میں نے (ایک دوسرا مسئلہ) عرض کیا : یارسول اللہ ! آپ جانتے ہیں کہ ہم کون لوگ ہیں ؟ اور کن لوگوں کے درمیان رہتے ہیں، ہمارا وہاں نگہبان کون ہوگا ؟ آپ (صلی اللہ علیہ وآلہ وسلم) نے ارشاد فرمایا : اللہ اور اس کا رسول (اسی پر بھروسہ رکھو) ۔ تب میں نے عرض کیا : ہم کو یہ (دونوں) کافی ہیں یارسول اللہ۔ البغوی، ابن عساکر