Kanz al-Ummal: Hadith 13902

13902 (مسند علی (رض)) ابو مطر سے مروی ہے فرماتے ہیں : میں نے دیکھا کہ حضرت علی (رض) کے پاس ایک آدمی لایا گیا۔ لوگوں نے کہا : اس نے اونٹ چوری کیا ہے۔ آپ (رض) نے اس کو مخاطب ہو کر فرمایا : مجھے نہیں لگتا کہ تم نے چوری کی ہوگی ؟ اس نے جواب دیا کیوں نہیں۔ آپ (رض) نے فرمایا : ممکن ہے تم نے کسی کا اونٹ اپنا سمجھ کر ہانک لیا ہو ؟ اس نے کہا : نہیں، بلکہ میں نے واقعی چوری کی ہے۔ حضرت علی (رض) نے اپنے غلام کو فرمایا : اے قنبر اس کو لے جا اور اس کی انگلی باندھ اور آگ جلا کر کاٹنے والے کو بلا لو تاکہ وہ اس کو کاٹ دے۔ پھر میرے آنے کا انتظار کرنا۔ اس سے پہلے نہ کاٹنا۔ چنانچہ پھر آپ (رض) اس کے پاس تشریف لے گئے۔ وہ اس منظر کو دیکھ کر ڈر گیا اور پھر آپ (رض) نے جب اس سے پوچھا : کیا تو نے چوری کی ہے ؟ تو تب اس نے انکار کردیا۔ لہٰذا آپ (رض) نے اس کو چھوڑ دیا۔ لوگوں نے عرض کیا : یا امیر المومنین ! آپ نے اس کو کیوں چھوڑا حالانکہ وہ اپنے جرم کا اقرار کرچکا تھا ؟ آپ (رض) نے فرمایا : میں نے اس کے اقرار پر اس کو سزا دینے کے لیے پکڑ لیا تھا لیکن پھر اسی کا انکار پر چھوڑ دیا۔ پھر آپ (رض) نے دور نبوت کا ایک واقعہ بیان کیا کہ آپ (صلی اللہ علیہ وآلہ وسلم) کے پاس ایک چور کو لایا گیا جس نے چوری کی تھی۔ آپ نے حکم دیا اور اس کا ہاتھ کاٹ دیا گیا۔ پھر آپ (صلی اللہ علیہ وآلہ وسلم) (دکھ کے مارے) رونے لگے۔ میں نے آپ سے پوچھا : آپ کیوں روتے ہیں ؟ تو آپ نے فرمایا : میں کیوں نہ رؤ وں جبکہ میرے امتی کا ہاتھ تمہارے سامنے کاٹا گیا۔ عرض کیا : یارسول اللہ ! پھر آپ نے اس کو معاف کیوں نہ کردیا ؟ آپ (صلی اللہ علیہ وآلہ وسلم) نے ارشاد فرمایا : وہ حاکم برا ہے جو حدود کو معاف کردے۔ لیکن تم آپس میں ہی حدود کو معاف کردیا کرو۔ مسند ابی یعلی
کلام : روایت ضعیف ہے۔ کنزج 5