Kanz al-Ummal: Hadith 14263

14263 ابوالجفاء الشامی فلسطینی سے مروی ہے کہ حضرت عمر بن خطاب (رض) کو کہا گیا امیر المومنین ! اگر آپ ولی عہد منتخب کرجاتے ! حضرت عمر (رض) نے فرمایا : اگر میں ابوعبیدۃ الجراح کو پالیتا تو ان کو والی بنا دیتا پھر میں اپنے پروردگار کے پاس جاتا اور پروردگار مجھ سے پوچھتا کہ تم امت محمدیہ پر کس کو خلیفہ بنا آئے ہو تو میں عرض کرتا کہ میں نے تیرے بندے اور تیرے نبی (صلی اللہ علیہ وآلہ وسلم) سے سنا ہے کہ ہر امت کا ایک امین ہوتا ہے اور اس امت کا امین ابوعبیدۃ بن الجراح ہے۔ اگر میں معاذ بن جبل کو پالیتا تو ان کو والی بنادیتا پھر میں اپنے رب کے پاس جاتا اور رب مجھ سے پوچھتا کہ امت محمدیہ پر کس کو خلیفہ بنا کر آئے ہو ؟ تو میں عرض کردیتا : میں نے تیرے بندے اور تیرے نبی (صلی اللہ علیہ وآلہ وسلم) سے سنا ہے : معاذ علماء کے درمیان سب سے اونچے مقام پر آئیں گے۔ اور اگر میں خالد بن الولید کو پالیتا تو ان کو والی بنادیتا پھر میں اپنے رب کے پاس جاتا اور رب مجھ سے پوچھتا کہ تم امت محمدیہ پر کس کو خلیفہ بنا کر آئے ہو تو میں عرض کرتا کہ میں نے تیرے بندے اور تیرے نبی (صلی اللہ علیہ وآلہ وسلم) سے خالد بن الولید کے متعلق ارشاد فرماتے ہوئے سنا ہے : وہ اللہ کی تلواروں میں سے ایک تلوار ہے جو اللہ پاک نے مشرکین پر سونت لی ہے۔ ابونعیم ، ابن عساکر
کلام : ابوالجفاء یہ مجہول نامعلوم راوی ہے معلوم نہیں وہ کون ہے اس بناء پر روایت محل کلام ہے۔