Kanz al-Ummal: Hadith 14290

14290 حیۃ بنت ابی حیۃ فرماتی ہیں : ایک آدمی (دن کی کڑی) دوپہر میں میرے پاس آیا میں نے پوچھا : اے بندہ خدا تیری کیا حاجت ہے ؟ آدمی نے کہا : میں اور میرا ساتھی اپنے اونٹ کی تلاش میں نکلے تھے۔ میرا ساتھی تو تلاش میں نکل گیا ہے جبکہ میں سائے میں آگیا تاکہ کچھ سستالوں، مجھے کچھ (پانی غیرہ) پینے کی طلب ہے۔ حیۃ کہتی ہیں : میں اپنی اونٹنی کے پاس گئی جو تھوڑا بہت دودھ دے دیتی تھی میں نے اس کا دودھ دوھ کر اس آدمی کو پلایا۔ مجھے اس آدمی میں نیک صورت نظر آئی۔ میں نے اس سے پوچھا : اے بندہ خدا تو کون ہے ؟ اس نے کہا : ابوبکر۔ میں نے پوچھا : کیا وہی ابوبکر جو رسول اللہ کا ساتھی ہے، جس کے متعلق میں نے سنا ہے ؟ اس نے کہا : جی ہاں۔ تب میں نے ابوبکر (رض) کو اپنے لوگوں کی زمانہ جاہلیت کی کچھ جنگوں اور دوستیوں کا حال سنایا جو قبیلہ حتعم وغیرہ کے ساتھ ہوئی تھیں۔ پھر میں نے پوچھا : اے اللہ کے بندے ! لوگوں کی امن و سکون والی یہ حالت کب تک رہے گی ؟ حضرت ابوبکر (رض) نے ارشاد فرمایا : جب تک ائمہ درست رہیں گے۔ پھر آپ (رض) نے فرمایا : کیا تو قبیلے کے سردار کو نہیں دیکھتی لوگ اس کی اتباع کرتے ہیں اور اس کی بات مانتے ہیں، پس یہ قوم کے سردار جب تک درست رہیں گے (تب تک یونہی امن و سکون رہے گا) ۔ مسدد، ابن منبع، مسند الدارمی
ابن کثیر (رح) فرماتے ہیں : اس کی اسناد حسن جید ہے۔