Kanz al-Ummal: Hadith 14419

14419 (مسند علی (رض)) حضرت علی (رض) سے مروی ہے کہ حضور اکرم (صلی اللہ علیہ وآلہ وسلم) سے دریافت کیا گیا : یارسول اللہ ! آپ کے بعد ہم کس کو اپنا امیر منتخب کریں ؟ حضور اکرم (صلی اللہ علیہ وآلہ وسلم) نے ارشاد فرمایا :
اگر تم ابوبکر کو اپنا امیر بناؤ تو اس کو امانت دار اور دنیا سے بےرغبت اور آخرت کا شوق رکھنے والا پاؤ گے۔ اور اگر تم عمر کو اپنا امیر بناؤ تو اس کو صاحب قوت، امانت دار اور اللہ کے بارے میں کسی ملامت کرنے والے کی ملامت کی پروا نہ کرنے والا پاؤ گے۔ اور اگر تم علی کو اپنا امیر بناؤ لیکن میرا خیال ہے کہ تم ایسا نہیں کرو گے اگر کرو گے تو تم اس کو سیدھی راہ چلانے والا اور سیدھی راہ پر گامزن پاؤ گے، وہ تم کو بالکل سیدھی راہ پر گامزن رکھے گا۔
مسند احمد ، فضائل الصحابۃ للخیثمۃ، مستدرک الحاکم، حلیۃ الاولیاء ابن الجوزی فی الواھیات، فاخطاء، ابن عساکر السنن لسعید بن منصور
کلام : ابن الجوزی (رح) نے اس روایت کو من گھڑت روایتوں میں شمار کیا ہے، لیکن امام سیوطی (رح) فرماتے ہیں یہ ابن الجوزی (رح) کو خطاء ہے۔
امام ہیثمی (رح) نے مجمع الزوائد میں اس کو نقل کیا ہے ج 5 ص 176، نیز فرماتے ہیں کہ امام احمد، امام بزار نے اس کو روایت کیا ہے اور طبرانی (رح) نے بھی الاوسط میں اس کو روایت کیا ہے جبکہ بزار کی روایت کے رجال ثقہ ہیں۔ واللہ اعلم بالصواب۔