Kanz al-Ummal: Hadith 18745

18745 ۔۔۔ حضرت عبداللہ ابن عباس (رض) سے مروی ہے کہ جب منگل کے روز رسول اللہ (صلی اللہ علیہ وآلہ وسلم) کی تکفین وغیرہ سے فارغ ہوئے اور آپ کو آپ کے کمرے میں آپ کی چارپائی پر لٹا دیا گیا تو پھر مسلمانوں میں اختلاف ہوا کہ آپ کو کہاں دفن کیا جائے ۔ کسی نے کہا : آپ کو مسجد میں دفن کردیا جائے ۔ کسی نے کہا : آپ کو اپنے صحابہ کرام رضوان اللہ تعالیٰ عنہم اجمعین کے درمیان (جنت البقیع) میں دفن کیا جائے ۔ سیدنا حضرت ابوبکر صدیق (رض) نے فرمایا : میں نے رسول اللہ (صلی اللہ علیہ وآلہ وسلم) کو فرماتے ہوئے سنا ہے۔ جب بھی کوئی نبی فوت ہوا ہے اس کو اسی جگہ دفن کیا گیا ہے جہاں اس کی روح قبض ہوئی ہے۔ چنانچہ رسول اللہ (صلی اللہ علیہ وآلہ وسلم) کا بستر جس پر آپ نے وفات پائی تھی ۔ وہاں سے ہٹایا گیا ۔ پھر اس کے نیچے قبر کھودی گئی ۔ (رواہ ابن سعد) کلام : ۔۔۔ اس کی سند متصل اور روات ثقہ ہیں مگر اس میں واقدی بھی ہے۔ لیکن شواہد اس کی روایت کے نقصان کو پورا کر رہے ہیں۔