Kanz al-Ummal: Hadith 18762

18762 ۔۔۔ عمرہ بنت عبدالرحمن ، حضور اکرم (صلی اللہ علیہ وآلہ وسلم) کی بیویوں سے روایت کرتی ہیں کہ صحابہ کرام رضوان اللہ تعالیٰ عنہم اجمعین حضور اکرم (صلی اللہ علیہ وآلہ وسلم) کی وفات کے موقع پر کہنے لگے : حضور اکرم (صلی اللہ علیہ وآلہ وسلم) کی قبر کیسے بنائیں ؟ کیا اس کو مسجد بنادیں ؟ سیدنا حضرت ابوبکر صدیق (رض) نے فرمایا : میں نے رسول اللہ (صلی اللہ علیہ وآلہ وسلم) کو ارشاد فرماتے ہوئے سنا ہے کہ آپ نے فرمایا : للہ پاک یہود و نصاری پر لعنت کرے انھوں نے اپنے انبیاء (علیہ السلام) کی قبروں کو مسجدیں بنا لیا۔ صحابہ کرام رضوان اللہ تعالیٰ عنہم اجمعین نے پوچھا تب آپ (صلی اللہ علیہ وآلہ وسلم) کی قبر کیسی بنائیں ؟ سیدنا حضرت ابوبکر صدیق (رض) نے فرمایا : ایک شخص مدینہ کا لحدی (بغلی) قبر بناتا ہے اور ایک شخص مکہ کا شق (سیدھی) قبر بناتا ہے۔ پس اے اللہ تیرے نزدیک جو محبوب قبر ہو اس کے بنانے والے کو مطلع کر دے وہ تیرے نبی کی قبر بنا دے ، پس ابو طلحہ جو لحدی قبر بناتے تھے اس کو اطلاع ہوگئی ، سیدنا حضرت ابوبکر صدیق (رض) نے ان کو حکم دیا کہ وہ رسول اللہ (صلی اللہ علیہ وآلہ وسلم) کے لیے قبر بنائیں ، چنانچہ پھر آپ کو (لحدی قبر میں) دفن کیا گیا اور اس پر (کچی) اینٹیں پاٹ دی گئیں ۔ (ابوبکر محمد بن حاتم بن زنجویہ البخاری فی کتاب فضائل الصدیق)