Kanz al-Ummal: Hadith 18769

18769 ۔۔۔ حضرت عائشۃ صدیقہ (رض) سے مروی ہے کہ حضرت فاطمہ بنت رسول اللہ (صلی اللہ علیہ وآلہ وسلم) نے سیدنا حضرت ابوبکر صدیق (رض) سے حضور اکرم (صلی اللہ علیہ وآلہ وسلم) کی وفات کے بعد سوال کیا کہ رسول اللہ (صلی اللہ علیہ وآلہ وسلم) نے جو غنیمت کے مال میں سے ترکہ چھوڑا ہے وہ ہمارے درمیان تقسیم فرما دیں۔ سیدنا حضرت ابوبکر صدیق (رض) ان کو فرمایا : رسول اللہ (صلی اللہ علیہ وآلہ وسلم) کا ارشاد ہے : انبیاء کا ترکہ صدقہ ہوتا ہے : ہم کسی کو وارث نہیں بناتے ، ہم جو چھوڑ جاتے ہیں وہ صدقہ ہوتا ہے۔ اس بات پر فاطمہ (رض) غصہ ہوگئیں اور سیدنا حضرت ابوبکر صدیق (رض) سے بات چیت چھوڑ دی ، اور اسی ترک تعلقات کی حالت میں وہ اللہ کو پیاری ہوگئیں ۔ حضرت فاطمہ (رض) حضور اکرم (صلی اللہ علیہ وآلہ وسلم) کے بعد چھ ماہ زندہ رہی تھیں ۔ فاطمہ (رض) ابوبکر (رض) سے اپنے حصہ کا سوال کر رہی تھیں جو رسول اللہ (صلی اللہ علیہ وآلہ وسلم) نے خیبر ، فدک ، اور مدینہ کے صدقا میں سے پیچھے چھوڑا تھا ۔ سیدنا حضرت ابوبکر صدیق (رض) نے اس سے انکار فرما دیا تھا اور فرمایا تھا : میں کوئی کام جو رسول اللہ (صلی اللہ علیہ وآلہ وسلم) کرتے تھے نہیں چھوڑوں گا بلکہ میں اس پر عمل کروں گا ، کیونکہ مجھے ڈر ہے کہ اگر میں نے آپ کا کوئی کام چھوڑ دیا تو میں راستے سے بھٹک جاؤں گا ۔ پھر مدینہ والا صدقہ تو سیدنا حضرت عمر ابن خطاب (رض) نے علی وعباس (رض) کو دے دیا تھا ۔ لیکن علی (رض) عباس (رض) پر غالب آگئے ،۔ جبکہ خیبر اور فدک کو سیدنا حضرت عمر ابن خطاب (رض) نے اپنے پاس روک لیا اور فرمایا یہ رسول اللہ (صلی اللہ علیہ وآلہ وسلم) کا وہ صدقہ ہے جو اسلام میں پیش آمدہ مصائب اور درپیش مسائل پر خرچ ہوتا تھا اور ان دونوں صدقات کا محافظ وہ ہوگا جو مسلمانوں کا امیر ہوگا ، پس وہ دونوں مال اسی حالت پر ہیں۔ (مسند احمد ، بخاری ، مسلم ، السنن للبیہقی)