Kanz al-Ummal: Hadith 18849

18849 ۔۔۔ حضرت عروہ (رح) سے مروی ہے جب اللہ تبارک وتعالیٰ نے خیبر کو حضور اکرم (صلی اللہ علیہ وآلہ وسلم) کے ہاتھوں پر فتح فرما دیا اور ان میں بہت سوں کو قتل کردیا تو زینب بنت الحارث یہودیہ نے جو مرحب یہودی کی بھتیجی تھی ، نبی (صلی اللہ علیہ وآلہ وسلم) کو ایک بھنی ہوئی بکری ہدیہ کی ۔ اور اس میں زہر ملا دیا ۔ اور جب اس کو خبر ملی کہ حضور اکرم (صلی اللہ علیہ وآلہ وسلم) شانے اور ستیوں کا گوشت زیادہ پسند فرماتے ہیں تو اس نے ان اعضاء میں زہر خوب اچھی طرح ملا دیا ، جب رسول اللہ (صلی اللہ علیہ وآلہ وسلم) اور بنی سلمہ کے بشر بن البراء بن معرور دونوں تشریف لائے تو اس عورت نے وہ بکری ہدی میں پیش کی ، حضور اکرم (صلی اللہ علیہ وآلہ وسلم) نے شانے اور دستیوں کو نوچ کر کھایا ، جبکہ بشر نے دوسری ہڈی سے گوشت نوچ کر کھایا ، جب رسول اللہ (صلی اللہ علیہ وآلہ وسلم) نے منہ میں موجود گوشت نگل لیا تو بشر نے بھی نگل لیا آپ (صلی اللہ علیہ وآلہ وسلم) نے فرمایا بکری سے ہاتھ اٹھالو ، بکری کا شانہ مجھے بتارہا ہے کہ مجھے اس میں دھوکا دیا گیا ہے۔ بشر نے عرض کیا : یا رسول اللہ (صلی اللہ علیہ وآلہ وسلم) ! قسم اس ذات کی جس نے آپ کو عزت دی ! میں نے وہ زہر اپنے لقمے میں محسوس کرلیا تھا لیکن مجھے تھوکنے سے یہ مانع ہوئی کہ آپ کے کھانے کو منغص (کرکرا) کر دوں ۔ جب آپ نے کھالی تو مجھے بھی آپ کی جان کے بعد اپنی جان کے ساتھ کوئی رغبت نہیں رہی ۔ میری خواہش تھی کہ آپ اس کو نہ نگلتے ۔ پھر بشر اپنی جگہ سے بھی نہ اٹھے تھے کہ ان کا رنگ سبز چادر کی طرح ہوگیا اور تکلیف نے ان کو دہرا کردیا ۔ اور ان کو جس طرح کیا جاتا ہوجاتے تھے ۔ جبکہ رسول اللہ (صلی اللہ علیہ وآلہ وسلم) ان کے بعد تین سال زندہ رہے اور پھر اس زہر کی تکلیف میں آپ کو مرض الموت لاحق ہوا جس میں آپ کی وفات ہوئی ۔ (الکبیر اللطبرانی ، ابن ابی شیبۃ)