Kanz al-Ummal: Hadith 18852

18852 ۔۔۔ (مراسیل عبدالرحمن بن القاسم) عبدالرحمن بن القاسم اپنے والد سے روایت کرتے ہیں : جس روز حضور اکرم (صلی اللہ علیہ وآلہ وسلم) کی وفات ہوئی اس روز صبح کی نماز حضور اکرم (صلی اللہ علیہ وآلہ وسلم) نے مسجد میں ادا فرمائی تھی ۔ بعض لوگ کہتے ہیں : رسول اللہ (صلی اللہ علیہ وآلہ وسلم) تشریف لائے تو سیدنا حضرت ابوبکر صدیق (رض) نماز پڑھ رہے تھے اور آپ ابوبکر کے پاؤں کے پاس بیٹھ گئے ۔ بعض لوگ کہتے ہیں کہ رسول اللہ (صلی اللہ علیہ وآلہ وسلم) آگے تھے ۔ لیکن اکثر لوگوں کا خیال کہتا ہے کہ ابوبکر (رض) آگے تھے ۔ پھر جب رسول اللہ (صلی اللہ علیہ وآلہ وسلم) نے نماز پڑھ لی تو فرمایا : اے صفیہ بنت عبدالمطلب ! اے رسول اللہ (صلی اللہ علیہ وآلہ وسلم) کی پھوپھی ! اور اے فاطمہ بنت محمد ! عمل کرتی رہنا ، میں اللہ سے تم کو کوئی چھٹکارا نہیں دلا سکتا ۔ سیدنا حضرت ابوبکر صدیق (رض) نے عرض کیا یا رسول اللہ ! آج میں آپ کو افاقہ مند (صحت مند) دیکھ رہا ہوں ، اور خارجہ کی بیٹی کا دن ہے۔ (سیدنا حضرت ابوبکر صدیق (رض) کی اہلیہ) چنانچہ سیدنا حضرت ابوبکر صدیق (رض) نے ان کے پاس جانے کے لیے اجازت مانگی آپ نے اجازت دے دی ، یہ سخ میں رہتی تھی جو مدینہ سے ایک یا دو میل کے فاصلہ پر تھا ۔ رسول اللہ (صلی اللہ علیہ وآلہ وسلم) بوجھل ہوگئے اور اس دن وفات پا گئے ۔ (رواہ ابن جریر)