Kanz al-Ummal: Hadith 21692

21692 ۔۔۔ نافع (رح) کی روایت ہے کہ حضرت ابن عمر (رض) نے انھیں دو کپڑے پہنائے چنانچہ ایک دن ابن عمر (رض) مسجد میں تشریف لائے اور نافع (رح) کو پایا وہ پورے جسم کو چادر سے لپیٹے ہوئے نماز پڑھ رہے تھے آپ (رض) نے فرمایا کیا تمہارے پاس دو کپڑے نہیں جنھیں تم پہن سکو میں نے عرض کیا جی ہاں مجھے دو کپڑے میسر ہیں۔ فرمایا مجھے بتاؤ اگر میں تمہیں گھر کے پیچھے بھیج دوں تو کیا پہن کر واپس آجاؤ گے میں نے اثبات میں جواب دیا آپ (رض) نے فرمایا کیا اللہ تبارک وتعالیٰ اس کے زیادہ لائق ہے کہ اس کے لیے زینت کی جائے ، یا لوگ اس کے زیادہ حقدار ہیں ؟ میں نے عرض کیا اللہ تبارک وتعالیٰ اس کا زیادہ حقدار ہے ، نافع (رح) کو ابن عمر (رض) نے رسول اللہ (صلی اللہ علیہ وآلہ وسلم) کی حدیث سنائی ، نافع (رح) کہتے ہیں مجھے یقین ہے کہ یہ مرفوع حدیث ہے۔ (موقوف نہیں ہے) وہ یہ کہ آپ (رض) نے فرمایا تم میں سے کوئی آدمی بھی یہودیوں کی طرح چادر نہ اوڑھے جسے دو کپڑے میسر ہوں وہ ایک کپڑے کو اوپر اوڑھے اور دوسرے کا ازار بنا لے اور پھر نماز پڑھے نافع کہتے ہیں کہ عبداللہ بن عمر (رض) جائز نہیں سمجھتے تھے کہ کوئی آدمی بغیر تہبند یا شلوار کے نماز پڑھے گو کہ جبہ ہی کیوں نہ پہن رکھا ہو ۔ (رواہ عبدالرزاق)