Kanz al-Ummal: Hadith 22811

22811 ۔۔۔ حضرت ابی (رض) کی روایت ہے کہ ایک مرتبہ حضور اکرم (صلی اللہ علیہ وآلہ وسلم) نے ہمیں فجر کی نماز پڑھائی جب نماز مکمل کی تو مسجد والوں کو قلیل سمجھ کر فرمایا حضور اکرم (صلی اللہ علیہ وآلہ وسلم) کیا فلاں حاضر ہے ؟ ہم نے عرض کیا جی ہاں ، حتی کہ تین آدمیوں کے متعلق دریافت کیا ۔ ایک روایت میں ہے کہ آپ (صلی اللہ علیہ وآلہ وسلم) نے پوچھا کیا یہاں فلاں آدمی موجود ہے ؟ صحابہ کرام رضوان اللہ تعالیٰ عنہم اجمعین نے عرض کیا جی ہاں ، پھر ایک اور آدمی کے متعلق پوچھا تو صحابہ کرام رضوان اللہ تعالیٰ عنہم اجمعین نے عرض کیا : جی ھاں وہ بھی موجود ہے۔ پھر آپ (صلی اللہ علیہ وآلہ وسلم) نے فرمایا : بلاشبہ منافقین پر فجر اور عشاء کی نماز بہت گراں گزرتی ہے۔ اگر تمہیں معلوم ہوتا کہ ان میں کیا ہے لامحالہ تم ایک دوسرے پر سبقت لے جاتے ، جان لو دو آدمیوں کی نماز اکیلے آدمی کی نماز سے افضل ہوتی ہے اور تین آدمیوں کی باجماعت نماز دو آدمیوں کی نماز سے افضل ہے : آدمی جتنے زیادہ ہوں گے اتنے ہی اللہ تعالیٰ کو زیادہ محبوب ہیں۔ (رواہ الضیاء المقدسی فی المختارہ و ابن ابی شیبۃ)