Kanz al-Ummal: Hadith 23090

23090 ۔۔۔ علی (رض) کی روایت ہے کہ ایک مرتبہ میں سیدنا حضرت عثمان ذوالنورین (رض) کے ساتھ جا رہا تھا ہم ایک مسجد کے پاس سے گزرے اس میں درزی تھا ۔ سیدنا حضرت عثمان ذوالنورین (رض) نے درزی کو مسجد سے باہر نکال دینے کا حکم دیا میں نے کہا : اے امیر المؤمنین ! یہ (درزی) مسجد میں جھاڑو دیتا ہے فرش پر پانی ڈالتا ہے اور مسجد کے دروازے بھی بند کرتا ہے سیدنا حضرت عثمان ذوالنورین (رض) نے فرمایا : اے ابو الحسن میں نے حضور اکرم (صلی اللہ علیہ وآلہ وسلم) کو سنا ہے فرما رہے تھے کہ اپنی مساجد کو کاریگروں (صنعتکاروں) سے بچاؤ (رواہ ابن عساکر والخطیب فی تلخیص المتشابہ) کلام : ۔۔۔ نیز اس حدیث کی سند میں انقطاع بھی ہے اور اس کی سند میں محمد بن مجیب بن محبوب ثقفی کوفی راوی ہے اس کے بارے میں ابو حاتم کہتے ہیں کہ یہ ذاہب الحدیث ہے۔ فائدہ : ۔۔۔ جہاں تک مسجد کی خدمت کی بات ہے اس میں ہر خاص وعام کو اجازت ہے چونکہ مسجد کی خدمت کار ثواب ہے اور ثواب کا مستحق ہر شخص ہے۔ واللہ اعلم۔