Kanz al-Ummal: Hadith 25988

25988 ۔۔۔ عن انس (رض) روایت کی ہے کہ نبی کریم (صلی اللہ علیہ وآلہ وسلم) نے حضرت سعد بن عبادہ (رض) کی عیادت کی آپ بغیر زین کے گدھی پر سوار ہوئے اور لگام بھی نہیں تھی ، جب آپ دروازے پر پہنچے سلام کیا ، سعد (رض) نے سن کر سلام کا جواب دیا اور دھیمی آواز میں جواب دیا ۔ رسول اللہ (صلی اللہ علیہ وآلہ وسلم) نے جواب نہ سنا اور دروازے سے واپس لوٹ گئے اور فرمایا : تین مرتبہ اجازت لو اگر تمہیں اجازت دے دے تو بہت اچھا ورنہ واپس لوٹ جاؤ جب حضرت سعد بن عبادہ انصاری (رض) نے یہ محسوس کرلیا کہ آپ واپس لوٹ رہے ہیں سرپٹ باہر نکلے اور آپ کے پیچھے ہو لیے اور عرض کیا : یا نبی اللہ ! اللہ تبارک وتعالیٰ مجھے آپ پر فدا کرے آپ نے جب بھی مجھے سلام کیا ہے میں نے سلام کا ضرور جواب دیا ہے اور آج میں نے آپ کو صرف اس لیے بلند آواز سے جواب نہیں دیا یا رسول اللہ ! میں چاہتا تھا کہ آپ مجھے اور زیادہ سلام کریں یا رسول اللہ ! میرے ماں باپ آپ پر قربان ہوں واپس تشریف لائیں چنانچہ حضرت سعد (رض) آپ (صلی اللہ علیہ وآلہ وسلم) کو واپس اپنے گھر لے آئے اور کشمش اور کھجوریں آپ کی خدمت میں پیش کیں جب رسول اللہ (صلی اللہ علیہ وآلہ وسلم) نے کھجوریں تناول فرما لیں اور اٹھنے کا ارادہ کیا تو تین دعائیں کیں ۔ تمہارا کھانا نیکو کار کھائیں تمہارے ہاں روزہ دار افطار کریں اور فرشتے تمہارے لیے دعائے استغفار کریں ۔ (رواہ ابن عساکر)