Kanz al-Ummal: Hadith 29992

29992 ۔۔۔ ابراہیم بن سعد عن ابیہ عن جدہ کی سند سے حضرت عبدالرحمن بن عوف (رض) کی روایت ہے کہ میں بدر کے دن ایک صف میں کھڑا تھا میرے دائیں بائیں دو نوجوان لڑکے کھڑے تھے میں نے انھیں اپنے آس ہونے کو اپنے لیے کمزوری کا باعث سمجھا اور یہ حالت مجھے ناگوار گزری ان میں سے ایک نے مجھے کہا : اے چچا مجھے ذرا ابو جہل دکھائیں میں نے کہا : بھلا تمہیں اس سے کیا کام پڑا ؟ اس نے کہا : میں نے رب تعالیٰ کے حضور منت مان رکھی ہے کہ اگر میں نے اسے دیکھا ضرور اسے قتل کروں گا ۔ دوسرے لڑکے نے بھی چپکے سے کہا : اے چچا مجھے ابوجہل دکھائیں میں نے کہا : تمہیں اس ستم گر سے کیا کام پڑا ہے ؟ اس نے بھی وہی جواب دیا کہ میں نے رب تعالیٰ کے حضور منت مان رکھی ہے کہ اگر میں نے اسے دیکھ لیا ضرور قتل کروں گا چنانچہ یکسر میری کیفیت بدل گئی اب میرے پاس اس کا ہونا باعث مسرت تھا میں نے ابو جہل کی طرف اشارہ کرکے کہا : وہ رہا پھر کیا تھا بس وہ دونوں شاہین کی طرح ابو جہل کی طرف لپکے وہ دونوں عفراء کے بیٹے تھے چنانچہ آنا فانا ان دونوں عقابوں نے ابوجہل کا غرور خاک میں ملا دیا ۔ (رواہ ابن ابی شیبۃ)