Kanz al-Ummal: Hadith 3025

3025: (جبرئیل (علیہ السلام) انسانی شکل میں حضور (صلی اللہ علیہ وآلہ وسلم) کی خدمت میں حاضر ہوئے اس دیگر صحابہ کرام بھی خدمت میں موجود تھے انہی کی تعلیم کے لیے حضرت جبرائیل (علیہ السلام) نے آپ (صلی اللہ علیہ وآلہ وسلم) سے سوال کیا : یا رسول اللہ ! مجھے قیامت کا بتائیے کب آئے گی ؟ تو آپ (صلی اللہ علیہ وآلہ وسلم) نے ذیل کا فرمان ارشاد فرمایا :
سبحان اللہ ! یہ غیب کی پانچ چیزوں میں سے ہے جن کو اللہ کے سوا کوئی نہیں جانتا : ان اللہ عندہ علم الساعۃ، وینزل الغیث، ویعلم ما فی الارحام، وما تدری نفس ما ذا تکسب غدا و ما تدری نفس بای ارض تموت ان اللہ علیم۔ خبیر۔ لقمان : آخری آیت۔
خدا ہی کو قیامت کا علم ہے اور وہی مینہ برساتا ہے اور وہی (حاملہ کے) پیٹ کی چیزوں کو جانتا ہے (کہ نر ہے یا مادہ) اور کوئی شخص نہیں جانتا کہ وہ کل کیا کام کرے گا اور کوئی متنفس نہیں جانتا کہ کس سرزمین میں اسے موت آئے گی بیشک خدا ہی جاننے والا (اور) خبردار ہے۔
مذکورہ آیت تلاوت فرما کر آپ (صلی اللہ علیہ وآلہ وسلم) نے جبرائیل (علیہ السلام) کو فرمایا : اگر تم چاہو تو میں تم کو قیامت کی علامات بتا دیتا ہوں نہ کہ حتمی وقت۔ وہ یہ کہ تو باندی کو دیکھے گا کہ وہ اپنے آقا کو جنے گی۔ (یعنی اولاد ماں پر یوں حکم چلائے گی گویا وہ ان کی باندی ہے نہ کہ ماں) اور تم بکریوں کے چرواہوں کو دیکھوگے کہ وہ بلند وبالا عمارتیں بنانے میں ایک دوسرے کا مقابلہ کریں گے۔ اور تم ننگوں اور بھوکوں کو لوگوں کا سردار بنتے دیکھوگے۔ پس یہ قیامت کی علامات اور اس کی نشانیاں ہیں۔ (مسند احمد، مسند البزار بروایت ابن عباس (رض)، مسند احمد بروایت ابی عامر (رض) وابی مالک (رض) ، ابن عساکر بروایت ابن تمیم (رض) ۔