Kanz al-Ummal: Hadith 3469

3469: ۔۔ موسیٰ بن عمران (علیہ السلام) کی جبرائیل (علیہ السلام) سے ملاقات ہوئی اور دریافت فرمایا : جو شخص آیت الکرسی اتنی اتنی مرتبہ پڑھے اس کے لیے کیا اجر ہے ؟ تو حضرت جبرائیل (علیہ السلام) اجر کی نوعیت بیان فرمائی۔ لیکن حضرت موسیٰ (علیہ السلام) (اتنی مرتبہ پڑھنے کی) طاقت نہیں رکھ سکے۔ چنانچہ موسیٰ (علیہ السلام) نے پروردگار سے دعا کی کہ مجھے اس (کے پڑھنے) سے عاجز و کمزور نہ فرما۔ حضرت جبرائیل (علیہ السلام) دوبارہ نازل ہوئے اور فرمایا : آپ کا پروردگار آپ کو فرماتا ہے : جس شخص نے ہر فرض نماز کے بعد یہ کلمات کہہ لیے تو رات دن میں چوبیس گھنٹے ہیں، ان میں ہر گھنٹے میں اس بندے کی طرف سے سات کروڑ نیکیاں آسمان پر جائیں گی اور فرشتے ان نیکیوں کو لکھنے میں صور پھونکے جانے کے دن تک لکھتے رہیں گے۔ وہ کلمات یہ ہیں :
اللہم انی اقدم الیک بین یدی کل نفس و لمحۃ ولحظۃ وطرفۃ یطرف بھا اھل السموات واھل الارض فی کل شئی ھو فی علمک کائن او قد کان، اقدم الیک بین یدی ذلک کلہ۔
اس کے بعد پوری آیت الکرسی پڑھے۔
اے اللہ ! ہر لمحہ ہر گھڑی اور ہر پل میں اہل آسمان و زمین جو پل پل گذار رہے ہیں اور ماضی میں اور مستقبل میں جس قدر لمحات وہ گذاریں اس قدر آپ کے روبرو میں آیۃ الکرسی پڑھتا ہوں۔ الحکیم عن ابن عباس (رض)۔