Kanz al-Ummal: Hadith 36182

٣٦١٧٣۔۔۔ محجن مولیٰ عثمان کی روایت ہے کہ میں حضرت عثمان (رض) کے ساتھ ان کی زمین میں تھا اتنے میں ایک دیہاتی عورت جو بدحالی سے دو چار تھی آپ کے پاس آئی اور کہنے لگی : مجھ سے زنا سرزد ہوا ہے آپ (رض) نے فرمایا : اے محجن اسے باہر نکال دو میں نے عورت باہر نکال دی وہ پھر لوٹ آئی اور کہنے لگی : مجھ سے زنا سرزد ہوا ہے آپ (رض) نے فرمایا : اے محجن اسے باہر نکال دو میں نے اسے باہر نکال دیا۔ وہ پھر واپس لوٹ آئی اور بولی : مجھ سے زنا سرزد ہوا ہے حضرت عثمان (رض) نے فرمایا : اے محجن ! تیری ہلاکت میں اسے بدحالی سے دو چار دیکھتا ہوں جس نے اسے شر پر اکسایا ہے اسے لے جاؤ اور اسے کھانا کھلاؤ اور کپڑے پہناؤ میں عورت کو لے کر چل دیا اور آپ (رض) کے حکم کی تعمیل کی کھانا کھا کر عورت کی جان میں جان آئی۔ عثمان (رض) نے فرمایا : اس عورت کو ایک گدھا دو اور اس پر کھجور آنا اور کشمش لاد کر دو اور پھر اسے لے جاؤ اور جو لوگ دیہات میں جا رہے ہوں اس کو ان کے ہمراہ کر دو اور ان سے کہو کہ اسے اس کے خاندان تک پہنچا دو ۔ میں نے آپ (رض) کے حکم کی تعمیل کی اسی دوران جب میں اسے اپنے ساتھ لیے جا رہا تھا میں نے اس سے پوچھا : امیر المومنین کے سامنے تو نے جو اقرار کیا ہے اس کی کیا حقیت ہے ؟ وہ بولی اس کی کوئی حقیقت نہیں میں نے تو محض اس بدحالی کی وجہ سے ایسا کیا تھا جس نے مجھے دوچار کردیا تھا۔ (رواہ العقیلی)