Kanz al-Ummal: Hadith 36209

٣٦٢٠٠۔۔۔ عقیل ابن شھاب سعید بن المسیب روایت نقل کرتے ہیں کہ ایک مرتبہ رسول کریم (صلی اللہ علیہ وآلہ وسلم) کی حضرت عثمان بن عفان (رض) سے ملاقات ہوئی عثمان (رض) غمزدہ اور پریشان تھے رسول اللہ (صلی اللہ علیہ وآلہ وسلم) نے فرمایا : اے عثمان تمہارا کیا حال ہے عرض کیا یا رسول اللہ ! میرے ماں باپ آپ پر قربان جائیں کیا جو پریشانی مجھے پیش آئی ہے لوگوں میں سے کسی کو ایسی پریشانی پیش آئی ہے رسول اللہ (صلی اللہ علیہ وآلہ وسلم) کی بیٹی جو میرے نکاح میں تھی وہ وفات پاچکی ہے اللہ تعالیٰ اسے غریق رحمت کرے جس کی وجہ سے میری پشت کمزور ہوگئی اور سسرالی رشتہ جاتا رہا جو میرے اور آپ کے درمیان قائم تھا رسول اللہ (صلی اللہ علیہ وآلہ وسلم) نے فرمایا : اے عثمان ! تم یہ بات دل سے کہتے ہو ؟ عرض کیا : یا رسول اللہ ! بخدا میں یہ بات دل سے کہتا ہوں چنانچہ اسی دوران آپ (صلی اللہ علیہ وآلہ وسلم) عثمان (رض) کے ساتھ گفتگو کر رہے تھے کہ اچانک رسول اللہ (صلی اللہ علیہ وآلہ وسلم) نے حضرت عثمان (رض) سے فرمایا : اے عثمان ! یہ ہیں جبرائیل مجھے اللہ تعالیٰ کا حکم سنا رہے ہیں کہ میں اس کی بہن ام کلثوم (رض) کا تمہارے ساتھ نکاح کر دوں اور اس کا مہر بھی اسی جیسا ہو چنانچہ رسول اللہ (صلی اللہ علیہ وآلہ وسلم) نے عثمان (رض) کا نکاح ام کلثوم (رض) سے کرا دیا۔ (قال ابن عساکر : ھذا مع ارسالہ اصح من حدیث مالک)