Kanz al-Ummal: Hadith 36226

٣٦٢١٧۔۔۔ عائشہ (رض) کی روایت ہے کہ محمد (صلی اللہ علیہ وآلہ وسلم) کے گھر والوں نے چار دن تک کوئی چیز نہ کھائی حتیٰ کہ بچے چیخنے لگے چنانچہ نبی کریم صلی اللہ علیہ گھر والوں کے پاس تشریف لائے اور فرمایا میرے بعد تم نے کوئی چیز پانی ہے ؟ میں نے عرض کیا : بھلا ہم کہاں سے پاتے اگر اللہ تعالیٰ آپ کے ہاتھ پر کسی چیز کو نہ لائے چنانچہ آپ (صلی اللہ علیہ وآلہ وسلم) وضو کیا اور حالت انقباض میں نکل گئے پھر کبھی ایک جگہ نماز پڑھی اور کبھی دوسری جگہ اور پھر دعا میں مصروف ہوگئے چنانچہ ان کے آخری حصہ میں عثمان (رض) ہمارے پاس تشریف لائے اجازت طلب کی میں نے چاہا کہ معاملہ عثمان (رض) سے پوشیدہ رکھوں لیکن پھر مجھے خیال آیا کہ یہ مالدار مسلمانوں میں سے ہیں شاید اللہ تعالیٰ نے ان کے ہاتھ پر ہمارے لیے کوئی مال بھیجا ہو میں نے انھیں اجازت دی اندر آکر فرمایا : اے اماں جان رسول اللہ (صلی اللہ علیہ وآلہ وسلم) کہاں ہیں ؟ میں نے کہا : اے بیٹا ! محمد (صلی اللہ علیہ وآلہ وسلم) کے گھر والوں نے چار دنوں سے کوئی چیز نہیں کھائی پھر میں نے عثمان (رض) کو رسول اللہ (صلی اللہ علیہ وآلہ وسلم) کے متعلق خبر دی عثمان (رض) رونے لگے اور پھر فرمایا اے المومنین ! اس دنیا کا ناس ہو جب آپ پر یہ مصیبت نازل ہوئی ہے تو آپ نے مجھے عبد الرحمن بن عوف ثابت بن قیس اور ہم جیسے دوسرے مالدار مسلمانوں کو خبر کیوں نہیں کی عثمان (رض) گھر سے باہر نکل گئے اور ہمارے لیے آٹا گندم اور کھجور کے بہت سارے تھیلے بھیجے کھال اترئی ہوئی ایک بکری بھی بھیجیں ایک تھیلی بھیجی جس میں تین سو درہم تھے پھر کہا : کہ یہ سامان تمہیں جلدی میں بھیجا ہے جب کہ عثمان (رض) خود روٹیاں اور بھونا ہوا بہت سا گوشت لے کر آئے اور کہا : یہ کھاؤ اور رسول اللہ (صلی اللہ علیہ وآلہ وسلم) کے لیے بھی رکھو پھر مجھے قسم دے کہ کہا جب بھی ایسی حالت ہو مجھے ضرور خبر کرو تھوڑی دیر بعد رسول اللہ (صلی اللہ علیہ وآلہ وسلم) تشریف لائے اور فرمایا : اے عائشہ ! میرے بعد تم نے کوئی چیز پائی ہے ؟ میں نے عرض کیا : جی ہاں یا رسول اللہ (صلی اللہ علیہ وآلہ وسلم) ! مجھے علم تھا کہ جب آپ اللہ تعالیٰ سے دعا کرتے ہوئے دیکھا کہ اتنا آٹا گندم اور کھجوریں ایک تھیلی جس میں تین سو درہم روٹیاں اور بھونا ہوا گوشت فرمایا کس نے دیا ہے ؟ میں نے عرض کیا : عثمان بن عفان (رض) میرے پاس آئے میں نے انھیں خبر کی وہ رونے لگے پھر مجھے قسم دی کہ جب بھی ایسی حالت ہو میں انھیں ضرور خبر کروں چنانچہ رسول اللہ (صلی اللہ علیہ وآلہ وسلم) بیٹھے نہیں اور فوراً مسجد کی طرف چل پڑے اور دونوں ہاتھ اٹھا کر دعا کرنے لگے، یا اللہ میں عثمان سے راضی ہوں تو بھی اس سے راضی ہوجا۔ تین
بار یہ دعا فرمائی۔ (رواہ ابو نعیم فی فضائل الصحابۃ وابن عساکر وابن قدامہ فی کتاب البکاء والرقۃ وابو نعیم)
کلام :۔۔۔ حدیث ضعیف ہے دیکھئے الشریۃ ٣٩١۔ ٣٩٢ والجامع المصنف ٣٥٨۔