Kanz al-Ummal: Hadith 36334

٣٦٣٢٤۔۔۔ ابراہیم بن عمرو بن محمد کی روایت ہے کہ میرے والد نے ابن عمر (رض) کے واسطہ سے حضرت حفصہ (رض) سے نقل کیا ہے کہ وہ بیٹھی ہوئی تھیں جب کہ عائشہ (رض) رسول اللہ (صلی اللہ علیہ وآلہ وسلم) کے ساتھ تھیں آپ نے فرمایا : میں چاہتا ہوں کہ میرے ساتھ میرا کوئی صحابی ہو تاکہ ہم گفتگو کریں عائشہ (رض) نے کہا : ابوبکر (رض) کو پیغام بھجوا کر بلوالیں۔ فرمایا : نہیں حفصہ (رض) نے کہا : عمر (رض) کو بلوائیں فرمایا : نہیں لیکن میں عثمان (رض) کو بلواتا ہوں چنانچہ عثمان (رض) آئے عائشہ (رض)، حفصہ (رض) دونوں پردے کے پیچھے چلی گئیں رسول اللہ (صلی اللہ علیہ وآلہ وسلم) نے عثمان (رض) سے فرمایا : تمہیں قتل کرکے شہید کیا جائے گا صبر کرنا اللہ تعالیٰ تمہیں صبر کی توفیق عطاء فرمائے اللہ تعالیٰ نے تمہیں بارہ سال چھ ماہ سے جو قمیص پہنائی ہوگی اسے ہرگز نہ اتارنا حتیٰ کہ اللہ تعالیٰ سے جا ملو اور وہ تم سے راضی ہو عثمان (رض) فرماتے ہیں نبی کریم (صلی اللہ علیہ وآلہ وسلم) نے میرے صبر کی دعا فرمائی ایک روایت میں ہے عثمان (رض) نے عرض کیا : اللہ تعالیٰ سے میرے لیے صبر کی دعا کریں فرمایا : یا اللہ ! اسے صبر کی توفیق عطاء فرما۔ جب عثمان (رض) اٹھ کر نکل گئے آپ (صلی اللہ علیہ وآلہ وسلم) نے فرمایا : اللہ تعالیٰ تمہیں صبر کی توفیق عطا فرمائے تمہیں عنقریب شہید کردیا جائے گا تمہیں روزے کی حالت میں موت آئے گی اور میرے ساتھ افطار کرو گے ابراہیم کہتے ہیں : مجھے میرے والد نے عبد الرحمن بن ابی بکر سے روایت نقل کی ہے کہ حضرت عائشہ (رض) نے بھی انھیں ایسی ہی حدیث سنائی ہے۔ (رواہ ابو یعلی وابن عساکر)
کلام :۔۔۔ حدیث ضعیف ہے دیکھئے ذخیرۃ الحفاظ ٥٩٢٩۔