Kanz al-Ummal: Hadith 36447

٣٦٤٣٧۔۔۔ جریر بجلی (رض) کی روایت ہے حج کے موقع پر ہم رسول اللہ (صلی اللہ علیہ وآلہ وسلم) کے ساتھ تھے یہ حجۃ الوداع تھا ہم مقام غدیرخم پہنچے اتنے میں اعلان ہوا ” الصلوٰۃ جامعہ “ مہاجرین و انصار سب جمع ہوگئے رسول اللہ (صلی اللہ علیہ وآلہ وسلم) ہمارے درمیان کھڑے ہوئے اور فرمایا : اے لوگو تم کسی کی گواہی دیتے ہو لوگوں نے کہا : ہم گواہی دیتے ہیں کہ اللہ تعالیٰ کے سوا کوئی معبود نہیں ارشاد ہوا پھر کس کی گواہی دیتے ہو۔ لوگوں نے کہا : یہ کہ محمد اللہ تعالیٰ کے بندے اور اس کے رسول ہیں : ارشاد ہوا : تمہارا ولی کون ہے ؟ لوگوں نے کہا : اللہ اور اس کا رسول ہمارا ولی ہے ارشاد فرمایا : تمہارا ولی کون ہے ؟ آپ نے اپنا دست اقدس حضرت علی (رض) کے بازو پر رکھا اور انھیں کھڑا کیا بازو چھوڑ کر ہاتھ پکڑ لیے اور فرمایا : اللہ اور اللہ کا رسول جس کا دوست ہو علی بھی اس کا دوست ہے یا اللہ ! جو علی سے دوستی رکھتا ہو اسے تو بھی اپنا دوست رکھ اور جو علی سے دشمنی رکھتا ہو تو بھی اسے دشمن رکھ یا اللہ ! لوگوں میں سے جو شخص علی سے محبت کرتا ہو تو اسے اپنا حبیب بنا لے جو اس سے بغض رکھتا ہو تو بھی اس سے بغض رکھ یا اللہ ! زمین پر دو نیک بندوں کے بعد علی کے سوا کسی کو نہیں پاتا جسے میں ودیعت سپرد کرکے جاؤ، لہٰذا اس میں بھلائی کا فیصلہ فرمانا۔ (رواہ الطبرانی)
فائدہ :۔۔۔ یہ حدیث مجمع الزوائد میں ہیشمی نے بھی ذکر کی ہے۔ دیکھئے ٩/١٠٦ لیکن اس کی سند میں بشر بن حرب ہے اسے ناقدین حدیث نے لین الحدیث قرار دیا ہے۔