Kanz al-Ummal: Hadith 36746

٣٦٧٣٦۔۔۔ حضرت عبداللہ بن عمر (رض) کی روایت ہے کہ جب حضرت عمر (رض) زخمی کر دئیے گئے اور آپ (رض) نے امر خلافت کے متعلق شوریٰ قائم کردی آپ کی خدمت میں حضرت حفصہ (رض) داخل ہوئیں اور عرض کیا : اے ابا جان ! لوگ کہتے ہیں یہ چھ لوگ پسندیدہ نہیں ہیں عمر (رض) نے فرمایا : مجھے سہارا دوں لوگوں نے آپ کو سہارا دے کر بیٹھایا آپ نے فرمایا : علی بن ابی طالب کے متعلق لوگ کچھ نہ کہیں چونکہ میں نے نبی کریم (صلی اللہ علیہ وآلہ وسلم) کو فرماتے سنا ہے کہ اے علی ! میرے ہاتھ میں ہاتھ دو قیامت کے دن میرے ساتھ جنت میں داخل ہوجاؤ گے عثمان بن عفان کے متعلق بھی کچھ نہ کہیں میں نے نبی کریم (صلی اللہ علیہ وآلہ وسلم) کو فرماتے سنا ہے جس دن عثمان (رض) کو موت آئے گی اس پر آسمان کے فرشتے نماز پڑھیں گے میں نے عرض کیا : یا رسول اللہ ! خصوصاً عثمان (رض) کے لیے یا سب مومنین کے لیے فرمایا : خصوصاً عثمان کے لیے طلحہ بن عبید اللہ کے متعلق کچھ نہ کہیں میں نے نبی کریم (صلی اللہ علیہ وآلہ وسلم) کو ایک رات فرماتے سنا ہے درآنحالیکہ آپ کا کجاوہ گرنے لگا تھا آپ نے فرمایا : میرا کجاوہ جو درست کرے گا جنت میں داخل ہوگا طلحہ (رض) نے بھاگ کر کجاوہ درست کیا اور آپ (رض) سواری پر سوار ہوئے پھر فرمایا : اے طلحہ ! یہ جبرائیل کھڑے ہیں اور تمہیں سلام کہہ رہے ہیں اور کہتے ہیں قیامت کی ہول ناکیوں میں میں تمہارے ساتھ رہوں گا حتیٰ کہ تمہیں ان سے نکال لوں ۔ زبیر بن عوام کے متعلق بھی نہ کہیں چونکہ میں نے نبی کریم (صلی اللہ علیہ وآلہ وسلم) کو ایک دن سوتے ہوئے دیکھا اور آپ کے پاس زبری (رض) چہرہ اقدس سے مکھیاں دفع کرنے بیٹھ گئے حتیٰ کہ جب آپ بیدار ہوئے ارشاد فرمایا : اے ابو عبداللہ : تم یہاں سے گئے نہیں ہو جواب دیا : میرے ماں باپ آپ پر فدا ہوں میں نہیں گیا : آپ نے ارشاد فرمایا : یہ جبرائیل کھڑے ہیں تمہیں سلام کہہ رہے ہیں اور کہتے ہیں : قیامت کے دن میں تمہارے ساتھ ہوں گا حتیٰ کہ جہنم کو تم سے دور کردوں سعد بن ابی وقاص کے متعلق بھی کچھ نہ کہیں میں نے نبی کریم (صلی اللہ علیہ وآلہ وسلم) کو فرماتے سنا ہے بدر کے دن جب کہ سعد نے اپنی کمان میں چودہ مرتبہ و تر ڈالا فرمایا : تم پر میرے ماں باپ فدا جائیں تیر برساؤ عبد الرحمن بن عوف کے بارے میں بھی کچھ نہ کہیں چنانچہ میں نے حضور نبی کریم (صلی اللہ علیہ وآلہ وسلم) کو فاطمہ (رض) کے گھر میں دیکھا جب کہ حسن (رض) اور حسین (رض) مارے بھوک کے رو رہے تھے نبی کریم (صلی اللہ علیہ وآلہ وسلم) نے فرمایا : ہمارے پاس کون شخص کوئی چیز لائے گا ؟ چنانچہ عبد الرحمن بن عوف (رض) ایک برتن لیے نمودار ہوئے اس میں حلوا اور دو روٹیاں تھیں روٹیوں کے درمیان چربی رکھی تھی نبی کریم (صلی اللہ علیہ وآلہ وسلم) نے فرمایا : اللہ تعالیٰ دنیا میں تمہاری کفایر کرے اور تمہاری آخرت کا میں ضامن ہوں۔ (رواہ اماذ بن المثنی فی زیارات مسند مسدد والطبرانی فی الاوسط وابو نعیم فی الفضائل للصحابۃ وابو بکر الشافعی فی الغیلانیات وابو الحسن بن بشران فی فوائدہ والخطیب فی تلخیص المتشابہ وابن عساکر والدیلمی وسندہ صحیح)