Kanz al-Ummal: Hadith 37846

٣٧٨٣٣۔۔۔ ابو الطاہر احمد بن السرح کہتے ہیں : ہمیں عبداللہ بن وھب نے بیان کیا انھوں نے ایک شخص سے روایت کیا۔ اس شخص نے ابن عجلان سے روایت کی۔ انھوں نے محمد بن المنکدر سے روایت کی کہ :
حضرت عمر بن خطاب (رض) ایک جنازے کی نماز پڑھانے کے لیے کھڑے ہوئے تو اچانک ایک آدمی نے پیچھے سے آواز دی : اللہ آپ پر رحم کرے، نماز میں جلدی نہ کیجئے۔ چنانچہ حضرت عمر (رض) نے جنازے کی تکبیر کہی اور اس آدمی نے بھی ان کے ساتھ تکبیر کہی پھر اس نے نماز میں یہ دعا کی :
ان تعذبہ فکثر اعصاک وان تغفر لہ ففقیر الی رحمتک۔
اے اللہ ! اگر تو اس کو عذاب دے تو بہت سے لوگ تیرے نافرمان ہیں اور اگر تو اس کو بخش دے تو یہ تیری رحمت کا محتاج ہے۔
پھر حضرت عمر (رض) اور آپ کے ساتھیوں نے اس شخص کو دیکھا۔ پھر جب میت کو دفن کردیا گیا تو اس آدمی نے
اس کی قبر کو مٹی دے کر فرمایا :
اے صاحب قبر ! خوشی کا مقام ہے تیرے لیے ! اگر تو کاہن یا نجومی نہ تھا، اور ٹیکس لینے والا نہ تھا، اور خزانچی نہ تھا، اور منشی نہ تھا اور پولیس والا نہ تھا۔
حضرت عمر (رض) نے ارشاد فرمایا : اس آدی کو میرے پاس لے کر آؤ۔ ہم اس سے اس کی نماز اور اس کے کلام کے متعلق پوچھیں گے۔ اور خود اس کے بارے میں پوچھیں گے کہ وہ کون ہے ؟ مگر وہ لوگوں کی نظروں سے اوجھل ہوگیا۔
لوگوں نے دیکھا تو اس کے پاؤں کا نشان ہاتھ بھر (آدھ گز کے قریب ) تھا۔
چنانچہ حضرت عمر (رض) نے ارشاد فرمایا : اللہ کی قسم ! یہ وہی خضر ہیں جن کے بارے میں ہم سے نبی اکرم (صلی اللہ علیہ وآلہ وسلم) نے بیان کیا تھا۔ (رواہ ابن عساکر)