Kanz al-Ummal: Hadith 38884

٣٨٨٧١۔۔۔ یاجوج ماجوج کو کھولا جائے گا۔ وہ لوگوں کی طرف آئیں گے جیسا کہ اللہ تعالیٰ نے فرمایا :” اور وہ ہر اونچی جگہ سے پھسلتے ہوں گے “ پوری زمین پر (ٹڈی دل) کی طرح چھاجائیں گے، اور مسلمان ان سے بچنے کے لیے اپنے شہروں اور قلعوں میں محفوظ ہو کر اپنے مال مویشی اپنے پاس روک لیں گے، وہ زمین کے پانی پی لیں گے یہاں تک کہ ان کے کچھ لوگ نہر پر سے گزریں گے تو اس کا (سارا) پانی پی لیں گے اور اسے خشک کرکے چھوڑیں گے اور بعد والے جب وہاں سے گزریں گے تو کہیں گے : یہاں بھی کبھی پانی تھا۔
اور جب وہی لوگ رہ جائیں گے جو کسی قلعہ یا شہر میں ہوں گے تو ان میں سے کوئی کہے گا : ان زمین والوں سے تو ہم فارغ ہوگئے، اب آسمان والے رہ گئے ہیں، پھر ان میں سے ایک اپنے نیزے کو ہلائے گا اور آسمان کی طرف پھینک دے گا تو وہ خون آلود ہو کر نیچے آزمائش اور فتنہ کے لیے لوٹے گا، وہ اسی حال میں ہوں گے کہ اللہ تعالیٰ ان کی گردنوں پر ایک کیڑا بھیجے گا جیسے ٹڈی کا کیڑا ہوتا ہے وہ ان کی گردنوں میں نکلے گا تو وہ مردہ پڑے ہوں گے ان کی کوئی آہٹ سنائی نہیں دے گی، تو مسلمان کہیں گے : کیا کوئی شخص ہمارے لیے اپنی جان کی قربانی دے گا تاکہ دیکھے ایسے دشمن کا کیا ہوا ؟ تو وہ شخص ان سے علیحدہ ہو کر اپنا محاسبہ کرکے کہ آج اس نے قتل ہوجاتا ہے ان کی طرف اترے گا، تو انھیں ایک دوسرے پر پڑے مردہ پائے : وہ اعلان کرے گا : مسلمانو ! خوشخبری ہو ! اللہ تعالیٰ نے تمہاری دشمن سے کفایت کردی ہے چنانچہ وہ اپنے شہروں اور قلعوں سے اپنے مویشی ہنکاتے ہوئے نکلیں گے تو ان کی خوراک ان (یاجوج ماجوج) کے گوشت ہوں گے جس سے وہ ایسے تندرست وتناور ہوں گے جیسے انھیں کوئی خاص نبات مل گئی ہو۔ (مسند احمد، ابن ماجہ، ابن حبان، حاکم عن ابی سعید)