Kanz al-Ummal: Hadith 3995

3995: (عبدالرحمن بن عوف رضی اللہ عن) حضرت عبدالرحمن (رض) بن عوف سے مروی ہے آپ (رض) فرماتے ہیں : میں مسجد میں داخل ہوا تو رسول اللہ (صلی اللہ علیہ وآلہ وسلم) کو مسجد سے باہر دیکھا۔ چنانچہ میں چلتا ہوا آپ (صلی اللہ علیہ وآلہ وسلم) کے پیچھے پہنچا۔ آپ (صلی اللہ علیہ وآلہ وسلم) نے اپنے پیچھے مجھے محسوس نہیں کیا اور آپ چلتے رہے حتی کہ ایک باغ میں داخل ہوگئے اور قبلہ رو ہوئے اور سجدہ میں پڑگئے اور بہت ہی لمبا سجدہ کیا، جب کہ میں آپ کے پیچھے تھا۔ آخر مجھے اندیشہ لاحق ہوا کہ شاید آپ اسی حالت میں وفات پاچکے ہیں۔ چنانچہ میں آگے ہوا اور میں نے سر نیچے کرکے آپ کے چہرہ انور کو دیکھا۔ آپ (صلی اللہ علیہ وآلہ وسلم) نے سر اٹھایا اور پوچھا : کیا بات ہے ؟ اے عبدالرحمن ! میں نے عرض کیا یا رسول اللہ ! آپ نے سجدہ بہت لمبا کردیا تو مجھے خطر ہوا کہ شاید اللہ نے آ پکی روح قبض فرما لی ہے۔ اس لیے میں دیکھنے لگا۔ آپ (صلی اللہ علیہ وآلہ وسلم) نے فرمایا : جب تم نے مجھے باغ میں داخل ہوتا دیکھا اس وقت جبرائیل (علیہ السلام) میرے پاس تشریف لائے تھے اور فرما گئے کہ (اے محمد) میں آپ کو خوشخبری دیتا ہوں کہ اللہ عزوجل فرماتے ہیں : جس نے آپ پر سلام بھیجا میں اس پر سلام بھیجوں گا اور جس نے آپ پر درود بھیجا میں اس پر درود بھیجوں گا۔ (رواہ ابن النجار)