Kanz al-Ummal: Hadith 44323

44310” مسند خباب بن ارت (رض) “ حضرت خباب بن ارت (رض) کہتے ہیں مجھے رسول کریم (صلی اللہ علیہ وآلہ وسلم) نے ایک مہم پر بھیجا میں نے عرض کیا یارسول اللہ (صلی اللہ علیہ وآلہ وسلم) ! آپ مجھے اتنے دور بھیج رہے ہیں اور مجھے آپ کا خوف ہے (کہیں آپ ہم سے جدا نہ ہوجائیں) ارشاد فرمایا : تمہارا خوف کس حد تک پہنچا ہوا ہے ؟ میں نے عرض کیا : میں صبح کرتا ہوں اور مجھے گمان نہیں ہوتا کہ آپ شام کرسکیں گے۔ ارشاد فرمایا : اے خباب ! پانچ کام کرلیا کرو تم مجھے دیکھ لو گے اگر نہ کئے تو مجھے نہیں دیکھ سکتے ۔ میں نے عرض کیا : یارسول اللہ وہ کیا ہیں فرمایا : اللہ تعالیٰ کی عبادت کرو اور اس کے ساتھ کسی کو شریک مت ٹھہراؤ گو تمہیں ٹکڑے ٹکڑے کردیا جائے یا آگ میں جلا دیا جائے تقدیر پر ایمان رکھو۔ میں نے عرض کیا یارسول اللہ ! تقدیر پر ایمان رکھنے کا کیا مطلب ہے ارشاد فرمایا : تمہیں علم ہو کہ جو مصیبت تمہیں پہنچی ہے وہ تم سے چوک نہیں سکتی تھی اور جو مصیبت ٹل گئی وہ تمہیں نہیں پہنچ سکتی تھی، شراب مت پیو چونکہ شراب کی خطا شاخدار ہوتی ہے درخت کی شاخوں کی طرح اس کی بھی شاخیں نکلتی ہیں والدین کے ساتھ حسن سلوک کرو گو کہ وہ تمہیں دنیا کی ہر چیز سے نکل جانے کا حکم ہی کیوں نہ دیں جماعت کے ساتھ چمٹے رہو چونکہ اللہ تعالیٰ کا ہاتھ جماعت پر ہوتا ہے اے خباب ! اگر تم نے مجھے قیامت کے دن دیکھ لیا گویا تم مجھ سے جدا نہیں ہوئے۔ رواہ الطبرانی