Kanz al-Ummal: Hadith 4593

4593: ۔۔ ابی معاویہ سے مروی ہے کہ ایک مرتبہ حضرت عمر بن خطاب (رض) منبر پر چڑھے۔ اور فرمایا : اے لوگو ! کیا تم میں سے کسی نے حضور (صلی اللہ علیہ وآلہ وسلم) کو حم عسق کی تفسیر کرتے ہوئے سنا ہے۔ حضرت ابن عباس (رض) اپنی جگہ اچھلے اور عرض کیا : میں نے (سنی ہے) پھر فرمایا : حم اللہ کے اسماء میں سے ایک اسم ہے۔ حضرت عمر (رض) نے پوچھا : عین کیا ہے ؟ ابن عباس (رض) نے فرمایا : عاین المشرکون عذاب یوم بدر۔۔ یعنی عین سے اشارہ ہے معائنہ کی طرف کہ مشرکین نے بدر کے دن اللہ کے عذاب کا معائنہ کرلیا۔ پوچھا سین کیا ہے ؟ فرمایا سیعلم الذین ظلموا ای منقلب ینقلبون۔ عنقریب وہ لوگ جان لیں گے جنہوں نے اپنی جان پر ظلم کیا کہ کس کروٹ لوٹے ہیں۔ پوچھا ق کیا ہے ؟ ابن عباس (رض) خاموش ہوگئے۔ حضرت عمر (رض) نے پھر فرمایا : میں تم سب کو اللہ کا واسطہ دیتا ہوں بتاؤ کیا کسی نے آپ (صلی اللہ علیہ وآلہ وسلم) کو آپ حم عسق کی تفسیر کرتے ہوئے سنا ہے ؟ پھر حضرت ابو ذر (رض) کو دے اور فرمایا : حم اللہ کے اسماء میں سے ایک اسم ہے۔ پوچھا عین ؟ فرمایا عاین المشرکون عذاب یوم بدر۔ پوچھا سین ؟ فرمایا سیعلم الذین ظلموا ای منقلب ینقلبون۔ پوچھا : قاف کیا ہے ؟ فرمایا : قارعۃ من السماء تصیب الناس۔ یعنی وہ کھٹکھٹانے والی (صور کی آواز یا کوئی آسمانی عذاب) جو لوگوں پر نازل ہوگی۔ (مسند ابی یعلی، ابن عساکر)