Kanz al-Ummal: Hadith 4732

4732: ۔۔۔ (مسند صدیق (رض)) حضرت ابوبکر (رض) سے مروی ہے، آپ فرماتے ہیں : میں مقام ابراہیم (علیہ السلام) کے پاس بیٹھا ہوا تھا اور رسول اللہ (صلی اللہ علیہ وآلہ وسلم) کعبہ کے سائے میں میرے سامنے تشریف فرما تھے۔ ابو لہب کی بیوی جمیل بنت حرب بن امیہ آئی اس کے پاس دو پتھر بھی تھے۔
ابولہب کی بیوی ام جمیل کی ایذا رسانی
ام جمیل نے مجھ سے پوچھا : کہاں ہے وہ شخص جس نے میری اور میرے شوہر کی برائی کی ہے ؟ اللہ کی قسم ! اگر میں اس کو دیکھ لوں تو ان دونوں پتھروں کے ساتھ اس کے خصیے پیس ڈالوں گی۔ (وہ حضور (صلی اللہ علیہ وآلہ وسلم) کا پوچھ رہی تھی) اور اس سے پہلے سورة لہب تبت یدا ابی لہب نازل ہوئی تھی (جس میں ابولہب اور اس کی بیوی ہر لعنت کی گئی تھی) آخر کار میں نے اس کو کہا اے ام جمیل ؟ اللہ کی قسم ! اس نے تیری برائی کی ہے اور نہ تیرے شوہر کی۔ ام جمیل بولی : اللہ کی قسم ! تو جھوٹا نہیں ہے۔ ویسے لوگ یہ کہہ رہے تھے۔ پھر وہ پیٹھ پھیر کر چلی گئی۔ میں نے (اس کے جانے کے بعد) عرض کیا : یا رسول اللہ ! اس نے آپ کو دیکھا نہیں۔ آپ (صلی اللہ علیہ وآلہ وسلم) نے فرمایا : میرے اور اس کے درمیان جبرائیل (علیہ السلام) حائل ہوگئے تھے۔ رواہ ابن مردویہ۔