Kanz al-Ummal: Hadith 632

٦٣٢۔۔ اے لڑکے ! کیا میں تجھ کو ایسی بات نہ بتاوں جو تیرے لیے نفع رساں ہو۔۔ اللہ کے حق کی حفاظت کر اللہ تیری حفاظت کرے گا۔ اللہ کے حق کی حفاظت کر تو اللہ کو اپنے سامنے پائے گا۔ فراخی اور خوشحالی میں اللہ کو یاد رکھ وہ تجھے سختی وشدت میں یاد رکھے گا یہ یقین کرلے کہ جو مصیبت تجھ کو پہنچی ہے وہ ہرگز چوکنے والی نہ تھی اور جو نہیں پہنچی وہ ہرگز پہنچنے والی نہ تھی اور یقین کر کہ اگر تمام مخلوق اس بات پر مجتمع ہوجائے کہ تجھے کوئی چیز عطا کرے مگر اللہ کی یہ منشاء نہ ہو تو وہ تمام لوگ اپنے فیصلہ پر قادر نہیں ہوسکتے اور اگر تمام مخلوق تجھ سے کوئی چیز چھیننا چاہے مگر پروردگار تجھے عطا کرنا چاہے تو ساری مخلوق اپنے فیصلہ پر قادر نہیں ہوسکتی۔
قیامت تک رونما ہونے والی تمام چیزوں کا قلم لکھ کر خشک ہوچکا ہے اور یاد رکھ جب تو سوال کرے تو صرف اللہ کے آگے دست سوال دراز کر اور جب مدد مانگے تو اللہ ہی سے مددمانگ اور جب تو کسی سے حفاظت اور پناہ طلب کرے تو اللہ ہی سے طلب کر۔ شکر اور یقین کے ساتھ اللہ کی عبادت کر۔ جان لے کہ ناپسند اور کراہت آمیز چیز پر صبر کرنا خیر کثیر کا باعث ہے اور نصرت خداوندی بھی صبر پر موقوف ہے کشادگی مصیبت و کرب کے ساتھ ہے اور ہر تنگی کے ساتھ دو گنا آسانی ہے۔ الطبرانی فی البیر، بروایت ابن عباس ، بروایت ابی سعید۔