Kanz al-Ummal: Hadith 7424

٧٤٢٤۔۔۔ جان بوجھ کر بیمار نہ بنا کرو (ورنہ) بیمار پڑجاؤ گے ، اور (مرنے سے پہلے ہی) اپنے لیے قبریں نہ کھود لیا کرو (ورنہ) مرجاؤ گے۔ (الدیلمی عن وھب بن قیس الثقفی)
تشریح :۔۔۔ انسان نفسیاتی طور پر جب کسی چیز کو اپنے دل و دماغ پر سوار کرلیتا ہے تو وہ آہستہ آہستہ اس کے دباؤ میں آجاتا ہے،
مثلاً جو لوگ جادو ٹونے تعویذ گنڈے اور جنات کا ڈر ہر وقت دل میں رکھتے اور بات بات پر ان سے متاثر ہوتے اور انھیں موثر سمجھتے ہیں وہ اکثر وہمی طور ان چیزوں میں مبتلا ہوجاتے ہیں دوسرا شخص انھیں لاکھ سمجھائے بجھائے لیکن وہ کسی کی بات قبول نہیں کرتے وہ کہتے ہیں ہم پر جو بیتی ہے وہی سچ ہے، حالانکہ وہ ان کا فقط وہم اور مالیخو لیا ہے، ورنہ جادو بذات خود کسی بیماری کا نام نہیں یہ ایک فن ہے ، اور جنات ایک مخلوق ہے جیسے چیونٹیاں ایک مخلوق ہیں لیکن لوگ چیونٹوں سے نہیں ڈرتے جنات سے خوفزدہ رہتے ہیں، وجہ اصل یہ ہے کہ نسلاً بعد نسل لوگوں میں جنات کا اتنا تاثر پھیلا ہے کہ لوگ ہر انہونی اور عجیب بات کو جنات کی طرف منسوب کرتے ہیں۔