10062 ۔۔۔ حضرت عثمان (رض) کے آزاد کردہ غلام فروخ فرماتے ہیں کہ ایک دن حضرت عمر (رض) مسجد سے نکلے تومسجد کے دروازے پر کھانے کی چیزیں بکھری ہوئی دیکھیں، چیزوں کی کثرت دیکھ کر آپ (رض) خوش ہوئے اور دریافت فرمایا، یہ کیا کھانے پینے کی چیزیں ہیں ؟ تو لوگوں نے جواب دیا کہ یہ کھانے پینے کی چیزیں ہمارے پاس لائی گئی ہیں، آپ (رض) نے فرمایا کہ اللہ تعالیٰ اس میں اور جو اس کو ہمارے پاس لایا ہے اس میں برکت عطا فرمائے، وہ لوگ جو آپ کے ساتھ ساتھ چل رہے تھے ان میں سے کچھ لوگوں نے کہا کہ اے امر المومنین ! اس مال کی توذخیرہ اندوزی کی گئی تھی، دریافت فرمایا کہ کس نے کی تھی ؟ لوگوں نے بتایا کہ حضرت عثمان (رض) کے فلاں آزاد کردہ غلام نے اور آپ کے فلاں آزاد کردہ غلام نے، آپ (رض) نے دونوں کو بلا بھیجا، (جب وہ آئے ) تو آپ (رض) نے دریافت فرمایا کہ تمہیں کس چیز نے اس پر ابھارا کہ تم مسلمانوں کی کھانے پینے کی چیزوں کی ذخیرہ اندوزی کرو ؟ تو ان دونوں نے کہا، اے امیر المومنین ! ہم نے اپنے مال سے خریدا ہے ہم اسے جیسے چاہیں بیچیں، حضرت عمر (رض) نے فرمایا کہ میں نے سنا جناب نبی کریم (صلی اللہ علیہ وآلہ وسلم) نے فرمایا کہ جس نے مسلمانوں کے کھانے پینے کی چیزوں کی ذخیرہ اندوزی کی تو اللہ تعالیٰ اسے افلاس اور کوڑھ کے مرض میں مبتلا کریں گے (یہ سن کر) فروخ نے کہا اے امیر المومنین ! میں نے اللہ تعالیٰ سے عہد کیا ہے کہ آئندہ ایسا نہ کروں گا، اور حضرت عمر (رض) کے آزاد کردہ غلام نے کہا اے امیر المومنین ! ہم جب چاہتے ہیں اپنے مال سے خریدتے ہیں اور جب چاہیں اپنا مال بیچتے ہیں، ابویحیی کا خیال ہے کہ انھوں نے حضرت عمر (رض) کے آزاد کردہ غلام کو کوڑھ کی حالت میں دیکھا۔ (عبدبن حمید، مسند ابی یعلی، اصبھانی فی الترغیب)