10105 ۔۔۔ ابن جریج عطاء سے ، وہ سعید بن المسیب سے اور وہ حضرت عمر (رض) سے اور وہ حضرت بلال (رض) سے روایت کرتے ہیں کہ جناب رسول اللہ (صلی اللہ علیہ وآلہ وسلم) کی کھجوریں میرے پاس تھیں وہ کچھ خراب ہونے لگیں تو میں بازار لے گیا اور دو صاع کے بدلے ایک صاع دوسری (عمدہ) کھجور لے آیا، اور جناب نبی کریم (صلی اللہ علیہ وآلہ وسلم) کی خدمت اقدس میں پیش کیں، آپ (صلی اللہ علیہ وآلہ وسلم) نے دریافت فرمایا کہ اے بلال ! یہ کیا ہے ؟ تو میں نے آپ (صلی اللہ علیہ وآلہ وسلم) کو تمام تفصیلات سے آگاہ کیا، تو آپ (صلی اللہ علیہ وآلہ وسلم) نے فرمایا، ٹھہرو، تم نے توسودی معاملہ کرلیا، اپنی بیع کو لوٹاؤ پھر کھجوروں کو سونے، چاندی یا گندم کے بدلے بیچو اور اس سے دوبارہ دوسری کھجوریں خریدلو، پھر آپ (صلی اللہ علیہ وآلہ وسلم) نے فرمایا کہ کھجور کے بدلے کھجوربرابر سرابر، گندم کے بدلے گندم برابرسرابر، سونے کے بدلے سونا ہم وزن مقدار میں، اور چاندی کے بدلے چاندی ہم وزن مقدار میں (بیچی جائے گی) اور جب خریدی جانے والی چیز بیچی جانے والی چیز کے مقابلے میں الگ ہو تو جائز ہے خواہ ایک دس کے بدلے ہو “۔ (طبرانی، ابو نعیم)