10418 ۔۔۔ ابن السمعانی اپنی سند سے حضرت علی (رض) سے روایت کرتے ہیں کہ آپ (رض) نے فرمایا کہ جناب نبی کریم (صلی اللہ علیہ وآلہ وسلم) کی وفات کے تین دن بعد ایک اعرابی آیا اور جناب رسول اکرم (صلی اللہ علیہ وآلہ وسلم) کی قبر مبارک سے چمٹ گیا اور اپنے سر میں مٹی ڈالنے لگا اور کہنے لگا، یا رسول اللہ ! آپ نے فرمایا تو ہم نے آپ کا فرمان سنا، آپ نے اللہ تعالیٰ سے بیان فرمایا اور ہم نے آپ سے بیان کیا، جو چیزیں اللہ تعالیٰ نے آپ پر نازل فرمائی تھیں ان میں یہ بھی ہے کہ ” اگر وہ اپنی جان پر ظلم کرنے کے بعد آپ کے پاس آئیں اور اللہ تعالیٰ سے معافی مانگیں اور اللہ کا رسول بھی ان کے لیے اللہ سے معافی مانگے تو وہ اللہ تعالیٰ توبہ کو قبول کرنے والا اور بہت مہربان رحم کرنے والا پائیں گے “۔ (سورة النساء آیت 63) ” اور میں نے تو اپنی جان پر ظلم کرلیا ہے اور آپ کے پاس اس لیے آیا تھا کہ آپ میرے لیے اللہ تعالیٰ سے معافی مانگیں گے، تو قبر کے اندر سے پکار کر کہا گیا کہ تجھے معاف کردیا گیا “۔