10439 ۔۔۔ عبدالرحمن بن السلمانی فرماتے ہیں کہ میں نے ایک صحابی سے سنا وہ فرما رہے تھے کہ میں نے رسول اللہ (صلی اللہ علیہ وآلہ وسلم) کو فرماتے سنا وہ فرما رہے تھے کہ جس شخص نے اپنی موت سے ایک دن پہلے بھی توبہ کرلی تو اللہ تعالیٰ اس کی توبہ قبول کرلیں گے، چنانچہ میں نے یہ روایت جناب رسول اللہ (صلی اللہ علیہ وآلہ وسلم) کے اصحاب میں سے ایک اور صحابی کو سنائی تو انھوں نے دریافت فرمایا کہ، کیا تو نے یہ سنا ہے، میں نے جواباً عرض کیا جی ہاں، تو انھوں نے فرمایا کہ تو میں گواہی دیتا ہوں کہ میں نے رسول اللہ (صلی اللہ علیہ وآلہ وسلم) سے سنا ہے کہ آپ (صلی اللہ علیہ وآلہ وسلم) نے فرمایا کہ جس شخص نے اپنی موت سے صرف اتنی دیر پہلے توبہ کرلی جتنا چاشت کا وقت ہوتا ہے تو اللہ تعالیٰ اس کی توبہ قبول فرمالیں گے، فرماتے ہیں کہ یہ روایت میں نے ایک اور صحابی کو سنائی تو انھوں نے دریافت فرمایا کہ کیا تو نے یہ سنا ہے ؟ میں نے جواباً عرض کیا جی ہاں، تو انھوں نے فرمایا کہ تو میں گواہی دیتا ہے کہ بیشک میں نے آپ (صلی اللہ علیہ وآلہ وسلم) سے سنا ہے کہ جو شخص نزع کی حالت طاری ہونے سے پہلے توبہ کرلے تو اللہ تعالیٰ اس کی توبہ قبول فرمالیتے ہیں “۔ (مسند احمد، ابن زنجویہ)