10441 ۔۔۔ حضرت ابن عمر (رض) فرماتے ہیں کہ میں جناب رسول اللہ (صلی اللہ علیہ وآلہ وسلم) کی خدمت اقدس میں بیٹھا تھا کہ اتنے میں بنو حارثہ میں سے ایک شخص حضرت حرملۃ بن زید الانصاری (رض) تشریف لائے اور آپ (صلی اللہ علیہ وآلہ وسلم) کے سامنے تشریف فرما ہوئے اور عرض کیا، یارسول اللہ ! ایمان تویہاں ہے (اور ہاتھ سے زبان کی طرف اشارہ کیا) اور نفاق یہاں ہے (اور ہاتھ سینے پر رکھا) اور اللہ کا ذکر بہت ہی کم کرتا ہے، جناب نبی کریم (صلی اللہ علیہ وآلہ وسلم) نے کچھ دیر سکوت فرمایا حضرت حرملۃ (رض) کی زبان کا کنارہ پکڑلیا اور یوں دعا کہ اے اللہ ! اس کی زبان کو سچا اور دل کو شکر کرنے والا بنادیجئے، اس کو میری اور مجھ سے محبت کرنے والے کی محبت عطا فرما دیجئے اور اس کا معاملہ بھلائی کی طرف فرما دیجئے حضرت حرملۃ (رض) نے پھر عرض کیا کہ یارسول اللہ ! میرے اور منافق بھائی بھی ہیں جن کا میں سردار تھا کیا میں ان کو بھی یا دعا بتادوں ؟ تو آپ (صلی اللہ علیہ وآلہ وسلم) نے فرمایا، جو ہمارے پاس آیا، جیسے تم آئے، تو ہم اس کے لیے معافی مانگیں گے جیسے تیرے لیے معافی مانگی اور جس نے اس پر اصرار کیا تو اس کے لیے اللہ ہی بہتر ہے “۔ (ابو نعیم)