11375 ۔۔۔ عبداللہ بن میمون المرائی روایت کرتے ہیں عوف سے اور عوف حسن سے یا خلاس سے (ابن میمون کو شک ہوگیا)
اور وہ حضرت علی (رض) سے کہ جناب رسول اللہ (صلی اللہ علیہ وآلہ وسلم) نے ان (حضرت علی (رض)) سے فرمایا کہ اے علی میں لوگوں کے درمیان اس مقابلے کو آپ کے حوالے کرتا ہوں تو حضرت علی اللہ عنہ نکلے اور حضرت سراقۃ بن مالک (رض) کو بلایا اور فرمایا کہ اے سراقہ ! رسول اللہ (صلی اللہ علیہ وآلہ وسلم) نے جو کام میرے ذمے لگایا وہ میں تمہارے ذمے لگاتا ہوں، سو جب تم میطار تک پہنچو۔ (ابوعبدالرحمن کہتے ہیں کہ میطار اس جگہ کو کہتے ہیں جہاں سے گھڑ دوڑ شروع ہوتی ہے) تو گھوڑوں کی صفیں درست کرواؤ۔ پھر پکارو، کیا کوئی لگام تھامنے والا ہے ؟ کیا کوئی لڑکے کو اٹھانے والا ہے اور کیا کوئی جھول پھیکنے والا ہے ؟ سو اگر کوئی بھی تمہیں جواب نہ دے تو تین مرتبہ تکبیر کہو اور تیسری مرتبہ میں اک کو چھوڑ دو ، اللہ تعالیٰ اپنی مخلوق سے جسے چاہے گا اس دوڑ سے نیک بخت کرے گا، اور حضرت علی (رض) اس انتہاء پر تشریف فرماہوا کرتے تھے جہاں دوڑ ختم ہوتی ہے، اور ایک لکیر لگا کر دو آدمیوں کو آمنے سامنے لکیر کے دونوں کناروں پر کھڑا کردیتے تھے اس طرح کہ لکیر ان کے پیروں کے انگوٹھوں کے درمیان ہوتی ہے، اور گھوڑے ان دونوں کناروں کے بیچ میں دوڑتے حضرت علی (رض) ان دونوں آدمیوں سے کہتے، کہ جب کوئی سوار اپنے ساتھی کے گھوڑے کے کان کے کنارے سے یا کان سے یا باگ دوا سے آگے نکل جائے تو جیت کا انعام اس کے لیے مقرر کردینا ، اگر تمہیں شک ہو تو جیت کا انعام آدھا آدھا تقسیم کردینا، اور جب تم دو چیزوں کو ملاؤ تو انتہاء ان میں سے چھوٹی چیز کو بنانا ، اور اسلام میں نہ جلب ہے نہ جنب اور نہ شعار “۔ (سنن کبری بیھقی)