١١٥۔۔ اے بلال کھڑے ہو اور لوگوں میں اعلان کردو کہ مومن کے سوا کوئی جنت میں داخل نہ ہوگا، اور اللہ تعالیٰ کسی فاسق شخص کے ذریعے بھی اس دین کی مدد کروالیتے ہیں بخاری ، بروایت ابوہریرہ۔
حضرت ابوہریرہ فرماتے ہیں کہ ہم غزوہ خیبر میں بغرض جہاد حضور کے ہمراہ تھے ایک شخص جو اسلام کا دعویددار تھا آپ نے اس کے متعلق ارشاد فرمایا کہ وہ شخص جہنمی ہے پھر جب جنگ کا بازار گرم ہوا تو اس شخص نے اسلام کی حمایت میں خوب شدت کے ساتھ جنگ کی حتی کہ اس کا کاری زخم لگا، اس شخص کی اسلام کی راہ میں جانفشانی دیکھ کر صحابہ کو تعجب کا سامنا ہوا۔ آخر بارگاہ نبوت میں سوال کیا گیا یارسول اللہ جس شخص کے متعلق آپ نے جہنمی ہونے کا حکم عائد فرمایا اس نے تو راہ خدا میں اپنی جان کی بازی لگادی، لیکن آپ اپنی رائے مبارک پر قائم رہے انجام کار اس شخص نے جنگ کے زخم سے عاجز آکر خود کشی کرلی۔ اور یہ خبر بارگاہ رسالت میں پہنچی تو آپ نے حضرت بلال کو حکم فرمایا اے بلال کھڑے ہو اور لوگوں میں اعلان کروادو کہ مومن کے سوا کوئی جنت میں داخل نہیں ہوگا، اور للہ کسی فاسق شخص کے ذریعے بھی اس دین کی مدد کروالیتے ہیں۔