11496 ۔۔۔ سالم بن ابن الجعد فرماتے ہیں کہ اہل نجران کی تعداد چالیس ہزار تھی اور حضرت عمر (رض) کو اس بات کا خطرہ تھا کہ کہیں یہ مسلمانوں پر حملہ نہ کربیٹھیں ، لیکن اہل نجران کے درمیان آپس میں حسد ہوگیا چنانچہ وہ حضرت عمر (رض) کے پاس آئے اور عرض کیا کہ ہمارا آپس میں جھگڑا ہوگیا ہے ہمیں جلاوطن کر دیجئے اور رسول اللہ (صلی اللہ علیہ وآلہ وسلم) نے بھی ان کے لیے دستاویز لکھی تھی کہ ان کو جلاوطن کیا جائے چنانچہ حضرت عمر (رض) نے موقع غنیمت جانا اور ان کو جلاوطن کردیا پھر وہ دربارہ حضرت عمر (رض) کے پاس آئے اور عرض کیا کہ پہلا والا معاملہ (یعنی جلاوطنی کا) ختم کر دیجئے، لیکن حضرت عمر (رض) نے انکار کردیا، جب حضرت علی (رض) کا دور خلافت آیا تو یہ لوگ پھر ان کے پاس آئے اور کہا کہ ہم آپ سے آپ کے دائیں ہاتھ کی لکیروں کے واسطے سے اور آپ کے نبی کے ہاں آپ کی سفارش کے واسطے سے عرض کرتے ہیں کہ آپ ہم سے پہلے والا معاملہ ختم کر دیجئے ، حضرت علی (رض) نے بھی انکار کردیا اور فرمایا کہ احمقو، عمر زیادہ معاملہ فہم تھے چنانچہ جو کچھ انھوں نے کیا ہے میں اس میں تبدیلی نہ کروں گا “۔
سالم کہتے ہیں کہ لوگوں کا خیال تھا کہ اگر حضرت علی (رض) پر کسی چیز میں طعن کرنے والے والے ہوتے تو اہل نجران کے معاملے میں کرتے۔ (ابن ابی شیبہ، ابوعبید فی الاموال، سنن کبری، بیھقی)