11549 ۔۔۔ سفیان بن وھب الخولانی فرماتے ہیں کہ میں نے حضرت عمر (رض) کو جابیہ نامی مقام پر دیکھا ، انھوں نے اللہ تعالیٰ کی ایسی حمد وثناء کی جس کے وہ لائق ہے پھر فرمایا امابعد، یہ مال فے جو اللہ تعالیٰ نے تمہیں عنایت فرمایا ہے بہت بلند مرتبہ اور عظیم الشان ہے، اس میں کوئی کسی سے زیادہ حق دار نہیں علاوہ ان دو محلوں یعنی لحکم اور جزام کے کیونکہ میں ان کے لیے کچھ تقسیم کرنے والا نہیں ہوں ، یہ سن کر بنولخم سے ایک شخص کھڑا ہوا اور کہنے لگا اے ابن الخطاب ! میں اپنے معاملے میں عدل اور برابری کرنے کے لیے اللہ کا واسطہ دیتا ہوں ، تو حضرت عمر (رض) نے فرمایا کہ عمر بن خطاب نے عدل اور برابری کا ارادہ کیا ہے اور خدا کی قسم میں جانتا ہوں اگر ہجرت صنعاء کی طرف ہوتی تو لخم وجزام میں سے چند ایک کے علاوہ کوئی اس طرف نہ جاتا، سو میں سفر کی مشقت برداشت کرنے اور سواری خریدنے والے کو اس شخص کی طرح نہ بناؤں گا جو اپنے علاقے میں لڑتے رہے، تو اسی وقت ابطوحریر کھڑے ہوئے اور کہا اے امیرالمومنین ! اگر اللہ تعالیٰ نے ہجرت ہمارے علاقے میں بھیجی ، ہم نے اس کی مدد کی اور تصدیق کی تو کیا یہی چیز ہے جو اسلام میں ہمارا حق ختم کردے ؟ تو حضرت عمر (رض) نے فرمایا کہ خدا کی قسم میں تمہارے لیے تین مرتبہ تقسیم کروں گا، پھر لوگوں کے درمیان تقسیم کیا، چنانچہ ہر شخص کو آدھا دینار ملا، اگر اس کے ساتھ اس کی بیوی بھی تھی تو اس کو پورا دینا دیا، اور اگر اکیلا تھا تو اس کو آدھا دینار دیا، پھر زمین والے ابن قاطورا کو بلایا اور فرمایا کہ مجھے بتاؤ کہ ایک شخص کے لیے ایک مہینے میں اور ایک دن میں کتنی خوراک کافی ہوجاتی ہے ؟ چنانچہ وہ دو مد اور قسط کے کر آیا اور عرض کیا یہ دو مد مہینے میں کافی ہوتی ہے اور ایک قسط زیتون کا تیل اور ایک قسط سرکہ چنانچہ حضرت عمر (رض) نے حکم دیا اور دو مدجو کے پیسے گئے اور ان کو گوندھا گیا اور پھر اس میں دوقسط زیتون کا تیل ملا کر سالن بنایا، پھر اس پر تیس آدمی کو بیٹھایا، تو ان کا پیٹ بھرنے کے لیے کافی ہوگیا ، پھر حضرت عمر (رض) نے دونوں مد اپنے دائیں ہاتھ میں اور قسط اپنے بائیں ہاتھ میں لیا اور فرمایا کہ اے میرے اللہ ! میں کسی کے لیے حلال نہیں کرتا تاکہ میرے بعد اس میں سے کچھ کم کرے، اے میرے اللہ ! جو ان میں سے کم کرے آپ اس کی عمر کم کر دیجئے “۔ (ابوعبید، فی الاموال ، یعقوب بن سفیان ، مسدد، سنن کبری بیھقی)