١١٦٠۔۔ اللہ تعالیٰ فرماتے ہیں جس نے میرے کسی دوست کی اہانت کی اس نے میرے ساتھ اعلان جنگ کردیا اور میں اپنے اولیاء کی نصرت میں سب سے زیادہ سرعت سے کام لیتاہوں اور ان کے لیے اس حملہ آور شیر کی طرح غضبناک ہوتاہوں۔ اور میں کسی چیز میں تردد کا شکار نہیں ہوتا سوائے اس کے کہ جب میرے بندہ کا آخری وقت آپہنچتا ہے اور وہ موت کو ناپسند کرتا ہے۔ جبکہ میں اس کی برائی کو ناپسند کرتا ہوں اور اس کے سوا چارہ کار نہیں اور کسی بندے نے دنیا کی بےرغبتی سے بڑھ کر میری عبادت نہیں کی۔ اور نہ کسی بندہ نے میرے فرائض کی ادائیگی کے سوا کسی اور چیز کے ذریعہ مجھ سے زیادہ تقرب حاصل کیا۔ اور میرا بندہ نوافل کے ذریعہ میرے قریب ہوتا جاتا ہے حتی کہ میں اس سے محبت کرنے لگ جاتاہوں اور جس سے میں محبت کرتا ہوں اور اس کے لیے میں کان، آنکھ اور ہاتھ بن جاتاہوں اور اس کا حمایتی و مددگار بن جاتاہوں اور اگر وہ مجھ سے سوال کرتا ہے تو میں اس کو عطا کرتا ہوں اور مجھے پکارتا ہے تو میں اس کو جواب دیتاہوں اور بعض میرے بندے اپنے لیے کسی عبادت کا دروازہ کھولنا چاہتے ہیں مگر میں اس بات کے پیش نظر اس دروازے کو اس پر بند رکھتاہوں کہ کہیں وہ عجب میں مبتلا نہ ہوجائے اور یہ اس کے لیے تباہی کا پیش خیمہ بن جائے۔ اور بعض میرے بندے ایسے ہوتے ہیں کہ ان کو فقرہی درست رکھتا ہے اگر میں ان کو مالداری بخش دوں تو یہی ان کی تباہی کا ذریعہ بن جائے۔ اور بعض میرے بندے ایسے ہیں کہ ان کے لیے صحت و تندرستی خیر کا باعث بنتی ہے اگر میں ان کو بیماری مبتلا کردوں تو یہ بیماری ان کو خراب کردے۔ اور بعض میرے بندے ایسے ہیں کہ ان کو بیماری ہی مناسب رہتی ہے۔ اگر میں ان کو صحت و تندرستی عنایت کردوں تو وہ فساد و خرابی کا شکار ہوجائیں۔ میں اپنے بندوں کے دلوں کا بھید جانتے ہوئے ان کے ساتھ معاملہ کرتا ہوں میں علیم وخبیر ذات ہوں۔ ابن ابی الدنیا فی کتاب الاولیاء الحکیم وابن مردویہ الحلیہ فی الاسماء ، ابن عساکر، بروایت انس (رض)۔