11745 ۔۔۔ طارق بن شہاب کہتے ہیں کہ ہم حضرت موسیٰ (علیہ السلام) کے پاس تھے تو ایک دن انھوں نے فرمایا کہ مجھ سے کم ملنا جلنا تمہیں تکلیف نہ دے گا کیونکہ یہ بیماری گھر والوں تک پہنچ چکی ہے یعنی طاعون، سو اگر کوئی کچھ تعبیر چاہے تو کرلے، اور ایسے دو آدمیوں سے بچو جن میں سے ایک کہنے والا یہ کہے کہ (اگر وہ کسی ایسی مجلس میں بیٹھا ہو جس میں کوئی طاعون کا مریض ہو) اور جو چلا گیا ہے (اگر وہ بچ گیا ہے تو ) یہ نہ کہے کہ اگر میں بیٹھ جاتا تو میں بھی اس بیماری میں مبتلا ہوجاتا جس میں وہ مبتلا ہوا جو اس مجلس میں بیٹھا تھا، کیونکہ میں تمہیں اس بیماری کے ظہور کے بارے میں وہ بات بتانے جارہا ہوں جو لوگوں کے لیے مناسب ہے (اور وہ یہ کہ ) جب امیر المومنین حضرت عمر (رض) نے سنا کہ شام میں بہت سے لوگ طاعون سے مرگئے ہیں تو انھوں نے حضرت ابوعبیدۃ بن الجراح کو لکھا کہ مجھے آپ سے ایک ضروری کام ہے جو آپ کے بغیر نہیں ہوسکتا سو جس رات آپ کو میرا خط ملے تو میرا خیال ہے کہ آپ کو اگلی ہی صبح روانہ ہوجانا چاہیے اور اگر خط دن کے وقت ملے تو شام تک آپ کو میرے پاس آنے کے لیے روانہ ہوجانا چاہیے۔
فاروق اعظم (رض) کے خط کا جواب
حضرت ابوعبیدۃ (رض) نے جواب میں لکھا کہ مجھے معلوم ہے کہ امیر المومنین کو مجھ سے کیا کام ہے وہ اس کو بچانا چاہتے ہیں جو باقی رہنے والا نہیں ہے، اور لکھ کہ میں مسلمانوں کے لشکر میں ہوں، اور خود کو ان سے الگ نہیں کرسکتا اور مجھے یہ بھی معلوم ہے کہ آپ کو مجھ سے کیا کام پڑگیا ہے آپ اس کو باقی رکھنا چاہتے ہیں جو باقی رہنے والا نہیں ہے سو جیسے ہی آپ تک میرا خط پہنچے تو میرے بارے میں اپنے عزائم کو منسوخ کر دیجئے اور مجھے اجازت دیجئے کہ میں یہیں بیٹھا رہوں۔
حضرت عمر (رض) نے جیسے ہی جواب خط پڑھا آپ (رض) کی آنکھوں سے آنسو بہنے لگے اور آپ رونے لگے آپ (رض) کے پاس موجود لوگوں میں سے کسی نے پوچھا کہ یا امیر المومنین کیا حضرت ابو عبیدۃ (رض) کی وفات ہوگئی ؟ تو حضرت عمر (رض) نے فرمایا کہ نہیں۔
حضرت عمر (رض) نے یہ بھی لکھا تھا کہ اردن گہری وباؤں والی سرزمین ہے اور جابیہ بارونق وصحت بخش علاقہ ہے لہٰذا مہاجرین کو لے کر وہاں منتقل ہوجائیں، حضرت ابو عبیدۃ (رض) نے جب یہ خط پڑھا تو فرمایا کہ رہا یہ خط تو ہم اس میں امیر المومنین کا حکم سنتے ہیں اور ان کی اطاعت کرتے ہیں اور انھوں نے مجھے حکم دیا ہے کہ میں سوار ہوجاؤں اور لوگوں کو ان کے ٹھکانوں پر پہنچاؤں، اتنے میں میری بیوی طاعون میں مبتلا ہوگئی سو میں حضرت ابوعبیدۃ (رض) کے پاس آیا اور انھیں بتایا، چنانچہ حضرت ابو عبیدۃ (رض) فوری طور پر لوگوں کو ان کے (محفوظ) ٹھکانوں پر منتقل کرنے لگے، اسی دوران خود بھی اسی بیماری میں مبتلا ہو کر وفات پاگئے۔
ابوالموجہ کہتے ہیں کہ ان کا خیال ہے کہ حضرت ابو عبیدۃ (رض) چھتیس ہزار (36000) مجاہدین کے ساتھ تھے جن میں سے صرف چھ ہزار (6000) باقی بچے۔
سفیان بن عینیہ نے اسی روایت کو طارق سے اپنی جامع میں اس سے مختصر روایت کیا ہے۔