11750 ۔۔۔ حضرت عبداللہ بن عباس (رض) فرماتے ہیں کہ حضرت عمر (رض) شام کی طرف روانہ ہوئے حتی کہ جب سرغ نامی جگہ پر پہنچے تو لشکروں کے امراء حضرت ابو عبیدۃ بن الجراح (رض) اور ان کے ساتھی وغیرہ آپ (رض) سے ملے اور بتایا کہ شام میں وبا پھیلی ہوئی ہے حضرت ابن عباس (رض) فرماتے ہیں کہ حضرت عمر (رض) نے فرمایا کہ ابتدائی مہاجرین کو بلاؤ چنانچہ ان کو بلایا گیا حضرت عمر (رض) نے ان سے مشورہ فرمایا، سب نے مختلف مشورے پیش کئے، بعض نے کہا کہ آپ ایک ضروری کام سے نکلے ہیں اور ہم نہیں سمجھتے کہ آپ کام کو مکمل کئے بغیر واپس چلے جائیں، اور بعض نے کہا کہ آپ کے ساتھ باقی لوگ اور رسول اللہ (صلی اللہ علیہ وآلہ وسلم) کے صحابہ ہیں آپ ان کو وبا کے سامنے نہ پیش کریں۔
حضرت عمر (رض) نے فرمایا کہ آپ سب لوگ یہاں سے تشری لے جائیں ، پھر انصار کو بلایا اور ان سے مشورہ کیا، وہاں بھی یہی ہوا سب نے الگ الگ آراء پیش کیں چنانچہ حضرت عمر (رض) نے ان کو بھی وہاں سے واپس بھیج دیا اور فرمایا کہ فتح مکہ میں جن قریشی مہاجرین نے شرکت کی تھی ان میں سے کسی بزرگ کو بلاؤ، چنانچہ ان میں سے دو بزرگوں نے ایک جیسی رائے دی اور کہا کہ ہمارا خیال ہے کہ آپ لوگوں کو واپس لے جائیں اور وبا کے سامنے پیش نہ کریں چنانچہ حضرت عمر (رض) نے اعلان کروادیا، کہ صبح کو ہم روانہ ہوں گے چنانچہ ایسا ہی ہوا حضرت ابو عبیدۃ بن الجراح (رض) نے عرض کیا، کہ کیا اللہ کی مقرر تقدیر سے بھاگ رہے ہیں ؟ تو حضرت عمر (رض) نے فرمایا کہ اے کاش ابو عبیدۃ یہ جملہ آپ کے علاوہ کوئی اور کہتا، ہاں ہم اللہ کی تقدیر سے اللہ کی تقدیر ہی طرف بھاگ رہے ہیں، آپ کا کیا خیال ہے کہ آپ اپنے اونٹ کے ساتھی جارہے ہوں کہ ایک ایسی وادی آجائے جس کے دو کنارے ہو ایک نہایت سرسبز و شاداب ہرابھرا اور دوسرا بنجر اور قحط زدہ، سو اگر آپ اپنے اونٹ کو سرسبز جگہ چروائیں تو اللہ کی تقدیر میں ہوں گے یا نہیں ؟ اور اگر قحط زدہ اور بنجر جگہ چروائیں تو اللہ کی تقدیر میں ہوں گے یا نہیں۔
طاعون والی زمین پر مت جانا
حضرت عبداللہ بن عباس (رض) نے فرمایا کہ اتنے میں حضرت عبدالرحمن بن عوف (رض) تشریف لے آئے جو اپنی کسی ضرورت کی وجہ سے وہاں موجود نہ تھے چنانچہ انھوں نے آکر فرمایا کہ میں اس بارے میں جانتا ہوں میں نے سنا جناب رسول اللہ (صلی اللہ علیہ وآلہ وسلم) فرما رہے تھے کہ جب تم سنو کہ کسی زمین پر طاعون ہے تو وہاں نہ جاؤ، اور جب کسی سرزمین میں طاعون پیدا ہوجائے اور تم وہاں موجود ہو تو پھر وہاں سے فرا ہونے کی نیت سے نہ نکلو۔ فرمایا کہ حضرت عمر (رض) نے
اللہ تعالیٰ کی حمدوثناء بیان کی اور روانہ ہوگئے۔ (مالک، سفیان بن عینیہ فی جامعہ، مسند احمد، بخاری، مسلم)