11752 ۔۔۔ حضرت عبد الرحمن بن غنم (رض) فرماتے ہیں کہ شام میں طاعون پھیلا تو حضرت عمرو بن العاص (رض) نے فرمایا کہ یہ طاعون ایک ڈانٹ ہے سو اس سے بچ کر وادیوں اور گھاٹیوں میں بھاگو، یہ بات حضرت شرحبیل بن حسنۃ (رض) کو معلوم ہوئی تو آپ (رض) غصے میں آگئے اور فرمایا کہ عمروبن العاص کو غلط فہمی ہوگئی ہے کیونکہ میں جناب نبی کریم (صلی اللہ علیہ وآلہ وسلم) کی خدمت اقدس میں موجود تھا اور عمرو بن العاص اپنے گھروالوں کے ساتھ کہیں گئے ہوئے تھے، یہ طاعون تو تمہارے نبی (صلی اللہ علیہ وآلہ وسلم) کی دعا اور تمہارے رب کی رحمت اور صالحین کی تم سے پہلے وفات ہے، یہ بات حضرت معاذ (رض) نے سنی تو حضرت معاذ (رض) نے دعا فرمائی کہ اے اللہ ! اس میں معاذ کی اولاد کا حصہ پورا پورا عطا فرما، چنانچہ ان کی دو صاحبزادیوں کی وفات ہوگئی اور صاحبزادے عبد الرحمن اس مرض میں مبتلا ہوگئے چنانچہ آپ نے یہ آیت پڑھی ” حق تو آپ کے رب ہی کی طرف سے ہے سو آپ نہ ہوں شک کرنے والوں میں سے “۔ (البقرۃ آیت 148)
اور یہ آیت بھی پڑھی کہ ” آپ عنقریب انشاء اللہ مجھے صبر کرنے والوں میں پائیں گے “۔ (الصافات آیت 102) انہی دنوں حضرت معاذ (رض) کی ہتھیلی کی پشت پر طاعون کا پھوڑا نکل آیا تو آپ نے فرمایا کہ یہ مجھے سرخ اونٹوں سے زیادہ محبوب ہے، انھوں نے اپنے پاس ایک شخص کو روتے دیکھا تو دریافت فرمایا کہ تو کیوں روتا ہے، عرض کیا اس علم کی بناء پر جو مجھے آپ سے حاصل ہوا ہے، تو فرمایا کہ پھر مت رو، حضرت ابراہیم ایسی سرزمین پر تھے کہ وہاں کوئی عالم نہ تھا تو اللہ تعالیٰ نے ان کو علم عطا فرمایا، سو جب میں وفات پاجاؤں تو علم کو چار لوگوں سے حاصل کرنا۔
1 ۔۔۔ عبداللہ بن مسعود (رض)۔ 2 ۔۔۔ عبداللہ بن سلام (رض)۔
3 ۔۔۔ سلمان (رض)۔ 4 ۔۔۔ اور ابوالدرداء (رض) ۔ (ابن خزیمہ)