12377 یوسف بن مالک سے مروی ہے کہ حضرت عمر (رض) بن الخطاب نکلے انھوں نے کئی سواروں کو دیکھا (جو تیزی سے سواری کررہے تھے) تو فرمایا کہ (یہ) سوار کون ہیں ؟ تو صحابہ (رض) نے عرض کیا کہ : حجاج کرام ہیں، تو حضرت عمر (رض) نے فرمایا کہ : کوئی اور مقصد تو ان کا نہیں تھا ؟ لوگوں نے کہا نہیں۔ حضرت عمر (رض) نے ارشاد فرمایا : اگر یہ سوار جان لیتے کہ کتنے ثواب اور اجر عظیم کے ساتھ انھوں نے اپنی سواریوں کو بٹھایا اور اٹھایا ہے اور ان کی مغفرت کے بعد ان کو جو اجر عظیم ملا ہے اس کو دیکھ کر ان کی آنکھیں ٹھنڈی ہوجاتیں، قسم ہے اس ذات کی جس کے ہاتھ میں عمر کی جان ہے ! اونٹنی جب بھی اپنا قدم اٹھاتی ہے اور رکھتی ہے تو اللہ پاک اس کے بدلے ایک درجہ بلند فرماتے ہیں اور گناہ مٹا دیتے ہیں اور ایک نیکی لکھ دیتے ہیں (حاجی کے لئے) ۔ الجامع لعبدالرزاق۔