12465 جعفر بن محمد اپنے والد سے روایت کرتے ہیں کہ حضرت مقداد بن اسود حضرت علی (رض) کے پاس سقیا (مکہ مدینہ کے درمیان مقام) پر تشریف لائے ۔ حضرت علی (رض) اپنے اونٹوں کو آٹا اور پتوں کا ملا ہوا پانی پلا رہے تھے۔ مقداد نے عرض کیا : یہ عثمان بن عفان (رض) حج اور عمرہ کے درمیان قران کرنے سے (دونوں کو ملانے سے) منع فرما رہے ہیں۔
راوی کہتے ہیں کہ پھر حضرت علی (رض)، حضرت عثمان (رض) کے پاس گئے اور پوچھا : کیا آپ حج اور عمرہ کو ساتھ ملانے سے منع فرما رہے ہیں۔ حضرت عثمان (رض) نے فرمایا : ہاں (یہ میری رائے ہے) یہ سن کر حضرت علی (رض) غصہ میں حج قران کا تلبیہ پڑھتے ہوئے نکلے :
لبیک بحج وعمرۃ معا۔
فائدہ : یہ میری رائے ہے کہ الفاظ موطا امام مالک میں اضافہ ہیں۔ یہ روایت بھی موطا امام مالک میں مذکور ہے، کتاب الحج باب القران۔