12475 (مسند عمر (رض)) حضرت ابوموسیٰ (رض) سے مروی ہے کہ میں حضور اکرم (صلی اللہ علیہ وآلہ وسلم) کی خدمت میں حاضر ہوا۔ آپ مقام بطحاء میں تھے۔ آپ (صلی اللہ علیہ وآلہ وسلم) نے مجھ سے پوچھا : کس چیز کا تلبیہ پڑھا ہے۔ میں نے عرض کیا : نبی کریم (صلی اللہ علیہ وآلہ وسلم) کے تلبیہ کی طرح میں نے تلبیہ کہا ہے۔ آپ (صلی اللہ علیہ وآلہ وسلم) نے پوچھا : کیا ھدی (قربانی کا جانور) ساتھ لائے ہو ؟ میں نے عرض کیا : نہیں ۔ تو آپ (صلی اللہ علیہ وآلہ وسلم) نے ارشاد فرمایا : تم بیت اللہ کا طواف کرو پھر صفا مروہ کا طواف کرو پھر (عمرہ سے) حلال ہوجاؤ۔ حضرت ابوموسیٰ (رض) فرماتے ہیں چنانچہ میں بیت اللہ کا پھر صفا ومروہ کا طواف کیا پھر میں اپنی قوم کی ایک عورت کے پاس آیا اس نے میرے بالوں میں کنگھی کردی اور میں نے اپنا سر دھولیا۔ پھر میں ابوبکر اور عمر (رض) کی خلافت میں اسی طرح فتویٰ دیتا رہا۔ پھر میں خلافت عمر میں موسم حج میں کھڑا تھا کہ ایک آدمی میرے پاس آیا اور بولا : آپ کو معلوم نہیں ہے کہ امیر المومنین نے حج کے بارے میں کیا نیا ارشاد صادر فرمایا ہے ؟ پھر میں نے لوگوں کو کہا : اے لوگو ! جن کو بھی ہم نے حج کا مسئلہ بتایا ہو (وہ اس کی جگہ) اب امیر المومنین کی اقتداء کریں وہ تمہارے پاس آرہے ہیں۔ چنانچہ جب حضرت عمر (رض) تشریف لائے تو میں نے پوچھا : وہ کیا طریقہ ہے جو آپ نے حج کے متعلق نیا فرمایا ہے ؟ حضرت عمر (رض) نے فرمایا : اگر ہم کتاب اللہ کو لیں تو اللہ تعالیٰ کا فرمان ہے :
واتموا الحج والعمرۃ للہ۔
حج اور عمرہ کو اللہ کے لیے پورا کرو۔
اور اگر ہم اپنے نبی کی سنت کو لیں تو آپ (صلی اللہ علیہ وآلہ وسلم) اس وقت تک حلال نہیں ہوئے جب تک کہ آپ نے ہدی (قربانی) کو نحر (قربانی) نہ کرلیا۔
مسند ابوداؤد، مسند احمد، البخاری، مسلم ، النسائی ، السنن للبیہقی۔