12485 (مسند علی (رض)) براء بن عاذب (رض) سے مروی ہے کہ جب حضور اکرم (صلی اللہ علیہ وآلہ وسلم) نے حضرت علی (رض) کو یمن کا امیر بنا کر بھیجا تو میں بھی حضرت علی (رض) کے ساتھ تھا۔ مجھے ان کے ساتھ کچھ اوقیہ چاندی بھی ملی۔ جب حضرت علی (رض) یمن سے واپس رسول اللہ (صلی اللہ علیہ وآلہ وسلم) کے پاس (مکہ میں دوران حج) آئے۔ پھر حضرت علی (رض) اپنے اہل خانہ سے لوٹ کر حضور کی خدمت میں آئے اور عرض کیا : میں نے فاطمہ کو دیکھا کہ اس نے رنگین کپڑے پہن رکھے ہیں اور اپنے کمرے کو بھی خوشبو میں بسا رکھا ہے (اور یہ علامتیں ہیں احرام سے حلال ہونے کی) تو فاطمہ مجھ سے بولی آپ کو کیا ہوا، حالانکہ رسول اللہ (صلی اللہ علیہ وآلہ وسلم) نے اپنے اصحاب کو حکم دیا ہے اور وہ (عمرہ سے) حلال ہوگئے ہیں۔ میں نے فاطمہ کو کہا : میں نے تو نبی اکرم (صلی اللہ علیہ وآلہ وسلم) کے تلبیہ جیسا تلبیہ پڑھا ہے۔ (یعنی افراد، قران، تمتع میں سے رسول اللہ نے جس طرح ارادہ کیا ہو وہی میرا ارادہ ہے) اب میں آپ (صلی اللہ علیہ وآلہ وسلم) کی خدمت میں حاضر ہوا ہوں۔ حضور (صلی اللہ علیہ وآلہ وسلم) نے مجھ سے پوچھا : تم نے کیا تلبیہ پڑھا ہے ؟ میں نے عرض کیا اھللت باھلال النبی (صلی اللہ علیہ وآلہ وسلم) یعنی میں احرام باندھتا ہوں جیسا بھی رسول اللہ (صلی اللہ علیہ وآلہ وسلم) نے احرام باندھا ہو۔ حضور (صلی اللہ علیہ وآلہ وسلم) نے فرمایا : میں تو ہدی قربانی کا جانور ساتھ لایا ہوں اور میں نے قران کیا ہے (حج وعمرہ کو ایک ساتھ کرنے کی نیت کی ہے) حضرت علی (رض) فرماتے ہیں : پھر (جب ہم حج قران سے فارغ ہوئے تو ) حضور (صلی اللہ علیہ وآلہ وسلم) نے مجھے فرمایا : سڑسٹھ یا چھیاسٹھ اونٹ نحر (ذبح) کرلو اور اپنے لیے تینتیس یا چونتیس اونٹ روک لو۔ اور ہر اونٹ میں میں سے میرے لیے گوشت کا ایک حصہ رکھنا۔
ابوداؤد، النسائی۔
فائدہ : اس روایت کو ایک جماعت نے تخریج کیا ہے اور مسلم نے بھی اس سے دلیل لی ہے۔ دیکھئے عون المعبود شرح سنن ابی داؤد 226/5 ۔